Accessibility links

җомга, 9 декабрь 2016, Казан вакыты 10:53

Rusiäneñ elekke premyer-ministrı 2008 yılda prezident bulırğa teli


Rusiädä 2008-nçe yılda uzarğa tieş prezident saylawlarına äle şaqtıy ğına waqıt bulsa da, anda qatnaşırğa teläwçe berençe nämzätneñ iseme bilgele buldı. Üzeneñ teläge turında bu atnada Rusiäneñ elekke premyer-ministrı Mixail Kasyanov belderde. Berniçä yıl elek ul xäzerge prezident Vladimir Putin belän bergä bulsa da, xökümät eşennän kitkännän soñ anıñ eçke häm iqtisadi säyäsäten tänqitläp tordı.

Mixail Kasyanov tağın ike yıldan soñ üzeneñ prezidentlıq yarışına çığu niätenä elegräk barı tik işarälär genä yasap kilgän ide, çärşämbedä isä ul bu xaqta açıqtan-açıq belderde. Xäbärçelärneñ şul turıdağı sorawına ul bolay dip cawap birde:

"Bügenge könge cawap äye. Äle öç ay elek kenä min bu uñaydan ikelängän bulsam, bügen min wäzğiatneñ min telägän yünäleştä üzgärmäwen kürep toram. Şuña kürä dä, ildäge säyäsi täräqqiatne millionlağan rusiäle ömet bağlağan däräcädä üzgärterlek keşe bulmağaç bigräk tä, min külägägä kitä almıym", di Rusiäneñ elekke premyer-ministrı üzeneñ prezidentlıq yarışına çığarğa äzerlänüe turında.

Mixail Kasyanov Putinneñ berençe prezidentlığınıñ zur öleşen xökümät çitäkçese bularaq ütkärde, ul üz eşennän uzğan yılnıñ fivralendä alınğan ide. Vladimir Putin şuşı ğämälen, näticäleräk eşläwçe xökümät kiräklege belän añlattı. Şunnan birle Kasyanov belän Putin arasındağı mönäsäbätlär daimi naçarayu yağına ğına taba bardı. Çärşämbedä elekke premyer, xäzer inde üzeneñ açıqtan-açıq oppozitsiä yağında buluın iğlan itte:

"Min şunı açıq itep äyter idem, il citäkçelege alıp barğan yünäleşne min yalğış dip sanıym, şul säbäple dä, äye, min säyäsi köndäş bulıp toram, ildä bötenläy başqa yünäleş alıp barılırğa tieş dip isäplim." Bu Rusiäneñ elekke premyerı Mixail Kasyanov süzläre ide.

Anıñ şuşı belderüläre häm bigräk tä üz tiräsendä liberal oppozitsiäne tuplarğa tırışuı prezident Putin tirälegendä açu ğına uyata. Kasyanov soñğı belderülären, üzenä qarşı cinayät eşe açu sürätendä yasadı. Prokuratura anı Mäskäwdä şikle alımnar yardämendä zatlı milek aluda ğäyepläde. Ul üze bar ğäyepläwlärne kire qağa häm Kreml'' aña qarşı pıçratu eşen alıp bara dip belderä.

Mäskäwdäge "Panorama" tikşerenü üzäge citäkçese Vladimir Pribılovski fikerenä qarağanda, Kasyanov isemen rişwätçelekkä bäylärgä tırışu, häm bigräk tä soñğı ğawğa sürätendä anıñ prezident bulu ixtimalı yuq däräcäsendä:

"Kasyanov ber genä saylawda da prezident bula almıy. Anıñ abruyı, anı yaqlaw däräcäse minimal, xalıq anı rişwätçelek simvolı itep kürä häm oppozitsiä köçläre dä anı citdi yaqlıy almıy", di Mixail Kasyanovnıñ prezident bulu ixtimalı turında Vladimir Pribılovski.

Belgeçlärneñ ikençeläre isä, aşığıç fiker yörtergä yaramıy digän qaraşta. "Heritage Foundation"nıñ Mäskäwdäge wäkile Yevgeni Volk, Kasyanovnıñ üz tiräsendä bülgälängän oppozitsiäne tuplıy ala almawı belän kileşsä dä, anıñ prezident yarışına çığuı Kreml'' öçen qayber awırlıqlar tudıra ala, di:

"Kasyanovnıñ 2008-nçe yılda prezident urını öçen yarışırğa teläwen belderüe Kreml'' öçen yanaw bulıp tora häm bu kiläse saylawlarğa citdi yarış tösen birä", di Yevgeni Volk. Mäğlüm ki, Rusiä Konstitutsiäse Putinne öçençe märtäbägä dä prezident itep saylanudan tıya.

Kärim Kamal
XS
SM
MD
LG