Accessibility links

пәнҗешәмбе, 8 декабрь 2016, Казан вакыты 03:17

Aynur Sibğatullin : Tatnetta zur bulmasa da, üseş bar.


1000 yıllıq çaraları ütep kitte. İnternet cämäğätçelek tä, bäyrämne kötü xisläre belän yäşäde, annan soñ, bäyrämennän alğan tä’sirlär belän büleşte. İnde xäzer, küplär köndälek tormışqa qayttı. Elekke proyektlarnı iskä töşerde, näticälär turında da uylana başladı. «Tatnet yoldızları» bäygesenä ğarizalar qabul itü tämamlanuı turında söylägän idek. Bäyge yılğa ber tapqır ütkärelä, häm şuña da, aña qarap, böten Tatnetqa küpmeder yoqmaq yasarğa mömkinlek tua. Bez, tapşıruıbızda, bıyılğı konkursta qatnaşuçılarğa qarap, küzätü yasağan idek inde. Xäzer, bäygeneñ töp oyıştıruçısı Aynur Sibğatillin da bu xaqtağı fikerläre belän büleşergä buldı. Bıltırğı bäyge belän bıyılğısı arasında nindi ayırma bar ikän? Bu sorawğa Aynur bolay cawap birä.« 2005 yılğı bäygedä 82 sayt qatnaşa. 2004 ttä 4-kä azraq ide. Ä 2003 yılda «Tatnet yoldızı» iseme öçen yarışqan internet säxifälärneñ sanı 115 buldı. Täqdim itelgän 82 saytnıñ küpçelek öleşe – berençe tapqır bäygedä qatnaşa. Tağın 12 sayt – ütkän yıllarda diplomnar alğan bulğan»

«Tatnet» programması, Aynurdan tağın, tatar telendäge nominatsiälär sanı turında da sorağan ide. İsegezdä bulsa, bäyge äle barğan waqıtta, tatar telendäge saytlar 2 genä tör buyınça yarışa ala, digän söyläşü buldı. Ul «Tuğan tel» häm «Mäğlümat çarası». Mäsälän, «Tatar dönyası», digän nominatsiä bar, ämma ul, urıs telendä genä. Şuşı tördä köç sınaşırğa telägän sayt, tatar telendä bulu säbäple, başqa törkemgä kerergä mäcbür buldı. Xäzer dä tatar telendäge säxifälär öçen 2 genä nominatsiä bar. Alarnıñ sanın arttırıp bulmadımı, dip soradıq bez Aynurdan. Menä anıñ cawabı. «Qızğanıçqa, yaña nominatsiälärne bülep çığarıp bulmadı. Bu xaqta bezgä däğwä belderüçelär dä buldı, fiker-alışular da bardı forumıbızda. Oyıştıruçılar, tatar saytları öçen yasalğan «Tuğan tel» nominatsiäsen ikegä bülergä bik tırıştı. Ämma, kriteriylar bik tögäl bulmaw arqasında häm başqa nigezlämälär belän bu eş mömkin bulmadı. Annan soñ, başqalar bezgä däğwä beldererlär ide. Professional däräcädä eşlängän tatar telendäge saytlar barıber bik az.» Tatnetta nindi dä bulsa üseş barlığın küräsezme? « Üseş bar, bez kötkänçä zur tügel, ämma bar. Härxäldä, san yağınnan. San sıyfatqa küçär mikän? Ägär buş cirdän barlıqqa kilgän şäxsi säxifä, zur proekt däräcäsenä üsep citä ikän, bu normal küreneş. Ägär säxifä, ber urında ğına taptalıp tora ikän, üsmi ikän, anıñ bäygedä ciñüe – ikele.

Bıyıl bäygedä, iñ kimendä 10 qızıqlı proekt qatnaşa. Alar nindider yañalıq alıp kilde. Elegräk barlıqqa kilgän säxifälär dä, üzgärgännär häm ciñügä ömetlänä ala. Älbättä, entzuastlar tarafınnan eşlängän saytlar bar yaqtan kamil tügel. Alarğa professionallar belän yarışu awır. Ämma, alarnıñ da mömkinlege bulırğa tieş, maxsus «öyränüçelär» öçen bezneñ «Xobbi» digän nominatsiä bar.» Aynur Sibğatullin bezgä ciñüçelär isemnären atamadı. Jyuri äle näticälärne iğlan itmäde. Nindi saytar bıyıl töp büläklärne alaçaq, älegä ber nindi farazlar äytelmi. Büläkläw çarası, sentäber axırında bulırğa tieş.

Bikä Timerova.

XS
SM
MD
LG