Accessibility links

шимбә, 3 декабрь 2016, Казан вакыты 03:18

"Quray" gazetası Närsä Turında Yaza?


Qırımdağı tatar-başqort federatsiäse näşer itkän "Quray" gazetasınıñ ikençe sanı dönya kürde. Anın berençe bitendä uquçılar Qazannın 1000 yıllığı, Salawat Yulayıv tuuına 251 yıl tuluı belän beyle mäqälälärne uqıy alalar.

Qazanğa bağışlanğan mäqälädä şähärneñ Könçığış häm Könbatış oçen borınğı zamannardan aradaşçı häm küper bulğanı, Rusiä, dönya tarihında,mädäniatında totqan urını xaqında äytelä. Şulay uq mäqälädä bügen Qazanda 1 million 108 meñ keşe yäşägäne, alar arasında 101 millät wäkile, 29 uqu yortı, 151 zur şirkät bulğanı, metro tözelgene haqında xäbär itelä.

Salawat Yulayıvnıñ 251 yıllığına bağışlanğan mäqlädän uquçılar anın ğomer yulı, Rusiä patşalığına qarşı köräşe, Baltik illärendä 1800 yılda, 46 yäşendä katorgada ülgäne häm başqa faktlar belen tanışa alalar. ’’Salawat Yulayıv başqort xalqının ruhiy ber simvolı bulıp qaldı’’, dip yaza tarih fännäre doktorı, şağır Fänil Kuzbekov.

"Quray" gazetasınıñ tulı ber bite Qırım qalası Aqmäçettä uzğan Bötenqırım sabantuyına bağışlanğan. ’’Sabantuyı – bu tik cır-biü tugel. Bu tatarlarnı mädäni, ruhiy yaqtan berläştergän unikal ber ğoref-ğädät, bu tatar xalqınıñ üz-üzenä qaytuınıñ ber çarası’’- dip yaza gazeta. Mäqälädä tatar Sabantuyın dönyaküläm miras itep terkäw täqdimen Qırımdağı Tatar-başqort federatsiäse Qırım Yuğarı Radasında yaqlarğa taqdim itkäne xäbär itelä. Uquçılar Aqmäçettä yäşägän, Qırımnan sörgen itelgän, küp balalı Kaneevlar ğailäse yazmışı, tatar telendä basılğan tabışmaqlar belän tanışa ala.

"Quraynıñ" sonğı bite balalarğa bağışlanğan. Monda "Balalar – bezneñ kiläçägebez" isemle mäqälä, İldar Yuzeevnıñ tatar telende "Balaçaq xıyalları", başqort telendä Mostay Kärimneñ "Os moğciza mine äsir aldı" şığerläre,"Min häm minem ğailä" isemle balalar arasında iğlan itelgen yarış şartları belän tanışa alalar uquçılar.

E menä Kievta yäşäwçe millättäşlärebez üzleren dönyağa televidenie aşa tanıtalar. Kievta uzğan Sabantuy haqında Ukraina telekanallarınıñ berse 20 minutlıq film töşergän häm çit illärdä yäşägän ukraınnar diasporası oçen 80 ildä kürsätkän.

Kievta uzğan "Kiev sanduğaçı" tatar cırı häm mädäniyatı festivale haqında töşerelgän film da tizdän bu kanal aşa kürsäteleçek. "Ukrainada, Kievta yäşäwçe tatarlar haqında töşerelgän filmnıñ da 1nçe seriäse inde äzer, anıñ berniçä seriäse bulaçaq"- dide "Tuğan tel" Bötenukrain tatar mädäni üzäge räise Qänäfiä Hösnetdinov.

Ukrainada in bay keşelerneñ berse dip sanalğan millättäşebez Rinat Ähmätov Ukraina bayları arasında 1nçe urınnan 3nçe urınğa töşkän. Bu haqta Polşada näşer itelgän "Wprost" jurnalı xäbär itä. Ä Könçığış Awropada iñ bay 100 keşe arasında Ähmätov $2,1 mlrd. baylığı belän 15nçe urınğa quyılğan.

Diläwär Osman, Aqmäçet

XS
SM
MD
LG