Accessibility links

пәнҗешәмбе, 8 декабрь 2016, Казан вакыты 01:22

Törkiädä xosusıylaştıru qabat kön tärtibenä mende


Törkiä inde 20 yıldan birle däwlät qaramağındağı şirkätlärne xosusilaştırırğa tırışa. Buyulı qabat Törkiäneñ iñ zur neft eşkärtü şirkäte Tüpraşnıñ 51% payın satu kön tärtibenä mende. Mäğlüm, ütkän yılda Törek Zorlu şirkätlär törkeme belän Tatneftneñ urtaq insiativası Tüpraşnıñ 67,7% payın 1 milliard 300 million dollarğa satıp alu uñışına ireşsälär dä Petrol İş yäğni Neft Eş hönär berlegeneñ Yuğarı Mäxkämädä açqan mäxkämäse näticäsendä bu satış köçtän çığarılğan ide. Inde bu yulı Tüpraşnıñ şuşı payın satıp alu öçen 9 insiativa köräşte. Berençe turdan soñ 5 insiativa ğına qaldı. Zorlu Holding yarışta bar ide. Buyulı ul üzenä urtaq bularaq ber Polek nefte şirkäten tapqan bulğan. İke urtaqnıñ 50-şär protsent payları bar ide. Başqa ber çit il insiativasın isä İndia Neft Kooperatsiäse belän Çalık Energiyä täşkil ittelär. Çalık Törek şirkäte bulsa da anıñ payı 49% bulu säbäple bu insiativağa çit il insiativası dip äytä alabız. Çönki şirkätlärdä 51% payğa kem iä bulsa, anıñ süze ütä. Yarışta qalğan ike genä Törek insiativası bar ide häm şulardan Koç yarışta berençe buldı. Koç qatnaşqan insiativada üzeneñ 80%, Shellneñ 9,9$ payı bar ide. Dimäk, küpçelek pay ber Törek şirkäte bulğan Koçtaydı. Koç-Shell insiativası Tüpraşnıñ 51% payına 4 milliard 140 million dollar täqdim yasap yarışnı ottı. Şulay itep Tüpraşnıñ bäyäse 8 milliardnıñ östenä çıqtı. İnde buyulı 51% payğa 4 milliard 140 million dollar täqdim itelüwe Tüpraşnıñ kimendä dürt märtäbä yuğarıraq bäyägä iä buluwın kürsätte. Şulay itep Tüpraşnıñ 51% payı çınnan da yuq bäyägä satılmağan bulaçaq. Bulaçaq dibez, çönki Nefte Eş Hönär Berlege bu satış turında da Yuğarı Mäxkämägä möräcäğät itte. Hönär Berlegenneñ advokatı Gökhan Candoğan Xosusilaştıru İdaräse Citäkçelegeneñ baş bäläse dip belenä. Ul keçkenäräk tä bulsa xosusıylaştıru buyınça ütkärelgän törle satışlarnı mäxkämälär aşa köçtän çığaruğa yaki tuqtatuğa ireşkän ber advokat bularaq belenä. Añarğa qayberäwlär berençe Tüpraş satışın tuqtatuwı säbäple "ilgä 3 milliard dollar qazandırğan şäxes" digän bäyä dä birälär.

Bu atnada säyäsät säxnäsendä

tamğa suqqan waqiğä isä Premier Tayyip Erdoğannıñ AQŞqa oçar aldınnan añarğa yasalğan säyäsi xöçüm belän ber keşeneñ añarğa attentat oyıştırırğa äzerlänü ğäyebe belän qulğa alınuwı buldı.

Ütkän atna azağında yäkşämbe kön Ğosmanlı Däwläteneñ nigezen salğan Osman Beyneñ atası Ertuğrul Gazinı Bileciktä ütkärelgän iskä alu bäyrämendä xaqimiättäge AK partiä belän parlamantqa da kerä almağan oppozitsiädäge Millätçe Xäräkät Partiäse (MXP) arasında citdi ızğış-talaş çıqtı. Yolada qatnaşqan Premier Erdoğanğa qarata MXP taraftarları “Törkiäne satqannı bez dä satarbız”, “Şähitlär ülmi, watan bülenmi”, Törkiä Törekter, Törek qalaçaq”, “Tayyip-Apo qulqulğa” kebek şiğarlar kütärdelär. Protest tawışları şul xätle kütärelde ki Erdoğan çığışın köçkä tämamlıy aldı. MXPnıñ Erdoğanğa şundıy protest yasawı öçen anıñ ike-öç atna elek “Bez Körd çınbarlığın qabul itäbez” dip belderüwe buldı. Anıñ Kördlärgä şundıy yağımlı mönäsäbätenä qaramastan idän astı Körd partizan oyışması PKKnıñ qorallı xöcümnäre tuqtalmadı. Menä Bileciktä Erdoğanğa proteslar bulğanda könyaq-köçığışta çıqqan bäreleşlärdä tağı 5 ğäskär şähit buldı. Qısaqsı kierenkelek üsä bara.

Äxtäm İbrahim, İstanbul
XS
SM
MD
LG