Accessibility links

шимбә, 10 декабрь 2016, Казан вакыты 19:46

Il tarixındağı berençe irekle parlament saylawları aldınnan Äfğanstanda iminlek çaraları kürelä


Äfğanstandağı amerikan köçläre tawış birüdä qatnaşu äwzem bulaçaq dip belderä, läkin berük waqıtta anda ğisyançılarnıñ politsiägä höcümnäre däwam itä häm bu xalıqnıñ saylawlarğa kilü telägenä tiskäre yoğıntı yasar digän qurqu bar.

Quşma Ştatlarnıñ Äfğanstandağı köçläre başlığı general Karl Eikenberry alay da kütärenke ruxta häm äfğannar şul höcümnärgä qaramastan tawış birügä kiler dip ömetlänä:

"İrtägä saylawlar uzaçaq, älbättä, qayber höcümnär bulır, ämma tawış birü bulaçaq. Terkälgän unike million saylawçı üz telägen belderü öçen bu saylawlarda küpläp qatnaşaçaq. Min şäxsän şuña ışanam ki, saylawlarnıñ irtägäsen, 19-nçe sintäbrdä bez, üz kiläçägen saylawlarda qatnaşıp bilgelägän äfğannarnıñ çın qaharman buluın añlap uyanaçaqbız", di Äfğanstandağı amerikan generalı.

Tawış birüne äzerläw çorında iminlek mäs''äläse iñ möhim problemalarnıñ berse bulıp tordı, bigräk tä, elekke "Taliban" qaldıqları haman da eş itkän könyaqta häm könçığışta. Qayçandır Äfğanstanda xakimlek itkän şuşı törkem yäkşämbe saylawların kire qaqtı häm xalıqnı anda qatnaşmasqa çaqırdı. Şimbägä qarşı töndä genä dä ğisyançılar başqala Qabulda häm könyaqtağı Qandahar wä Zabul wilayätlärendä politsiä üzäklärenä höcüm itep, şul bäreleşlär näticäsendä kimendä 12 keşe hälak bulğan dip xäbär itelä. Politsiä üzeneñ 3 xezmätkären yuğaltqan.

Şundıy höcümnärdä bıyıl meñnän artıq keşe üterelde, alarnıñ zur öleşen xäzerge xakimiatkä qarşı çıqqan ğisyançılar täşkil itä. Älege totrıqsızlıq sürätendä yäkşämbe saylawları aldınnan Äfğanstandağı cirle iminlek köçläre dä, çit il ğäskärläre xäwef xälenä kiterelde. Könyaqtağı Qandahar şähärendä şartlawlardan qurqu säbäple cirle xakimiat qalağa maşinalar kertüne tıydı. Şundıy şomlı wäzğiatkä dä qaramastan, ğadi äfğanlılar saylawlarda qatnaşırğa teläwen belderä. Qandaharda yäşäwçe Äxmädulla:

"Bez "Taliban" yanawlarınnan qurıqmıybız, ilebezneñ yaxşıraq kiläçäge öçen tawış birüdä qatnaşaçaqbız. Monı eşläwdän bezne berni dä tuqtatmayaçaq", di Qandahar şähärendä yäşäwçe Äxmädulla.

Bıltır üktäbrdä Äfğanstanda prezident saylawları uzğanda da, "Taliban" alarnı bozu belän yanağan ide, ämma ul moña ireşä almadı - tawış birüdä barlığı 8 million keşe qatnaştı.

Kärim Kamal
XS
SM
MD
LG