Accessibility links

дүшәмбе, 5 декабрь 2016, Казан вакыты 11:33

Xalıqara cämäğätçelek Äfğänstanda ütkän parlament saylawların xuplıy


Äfğänstandağı urtaq saylawlar şurası räise Bismilla Bismil yäkşämbe könne ütkän parlament saylawların zur ciñü dip bäyäläde. "İminlek öçen borçılular buluğa qaramastan, saylawlar bik yaxşı tärtip belän häm tınıç uzdı. Bu beryaqtan iminlek öçen cawaplı äfğän häm xalıqara köçlärneñ tırışlığın häm üz eşlärenä birelgänlegen kürsätä. İkençe yaqtan Äfğän xalqınıñ nıqlı säyäsi xäbärdarlığın häm säyäsi aktivlığın kürsätä" dide Bismil. Xalıqara cämäğätçelek tä kiçä Äfğänstanda ütkän saylawlarğa xuplaw belderä. Yewropa Berlegeneñ saylawlarnı küzätüçe baş wäkile Emma Bonino tawış birü ğömümän alğanda yaxşı oyıştırıldı häm tınıç ütte dide. Paqstan tışqı eşlär ministrlığı tawış birüneñ zur köç qullanularsız ğına ütüenä şat buluın belderde. Fransiä tışqı eşlär ministrlığı süzçese Denis Simonneau bu saylawlar demokratiägä taba zur tärräqiät dide. Äfğän saylawların AQŞ prezidentı George Bush, Britaniä premyer ministrı Tony Blair häm NATO başlığı Jaap de Hoop Scheffer da xupladı. Ämma bügen Rusiä saqlanu eşlär ministrı Sergey İvanov bu saylawlar Äfğänstannan Rusiägä häm başqa illärgä norkotiklar ağımın kimetergä yardäm itmiäçäk dide. Yäkşämbe könne ütkän parlament saylawlarında terkälgän saylawçılarnıñ 50 protsenttan artığı ğına tawış birde. Berençel näticälär üktäber başında iğlan iteler dip kötelä.

XS
SM
MD
LG