Accessibility links

пәнҗешәмбе, 8 декабрь 2016, Казан вакыты 21:17

Samarnıñ "Duslıq tacı" dusların cıydı


Samarğa terälep torğan Qızıl Yar rayonında “Duslıq tacı” isemle xalıqlar duslığı bäyräme uzdı. Samara ölkä Duslıq yortı oyıştırğan bu bäyrämdä untuğız milli-mädäni cämğiät qatnaştı. Rayonnıñ “Voljskiy” bistäse bu könne elekke SSSRnı xäterlätte. Milli kiemnär, törledän-törle cır- biyülär, xalıq uyınnarı. Bistä urtasında urnaşqan mäydanda balalar ayıruça şat yözle idelär, çönki alar şundıy tamaşanı ğömerlärendä berençe kürüläre ide bit.

Guberna Duma räise Viktor Sazonov ta xalıq aldında mondıyıraq fiker äytte: “Soñğı yıllarda zäñgär ekrannarda ütereş-suyış, äxlaqsızlıq küreneşläre xökem sörgändä bügenge bäyräm ayıruça qäderle.”

Säxnädän çığış yasağan untuğız kollektivnıñ bersen alğa, ikençesen artqa çigenderep bulmıy. Beräwlär , folklor yağın öskä kütärsälär, ikençeläre zamança sipterdelär cırlarnı. Tatar milli xäräkäte isemennän çığış yasağan “İdel” ansambleneñ çığışı milli dä yañğıradı, şul uq waqıtta zamança ciñel dä qabul itelde. Talyan, garmun, saksofon tatar xalıq köyläreneñ asıl yaqların teläsä qaysı millät küñelenä citkezä aldı, çönki Midxät Äminev, Ali Gubanovlar şul qorallarda uynawçı çın hönärmännär.

Untuğız milli üzäk untuğız kürgäzmä täqdim itte. Härbersenä tulı ireklek birelgänlektän, kem närsä kürsätergä teläsä şunı oyıştırğan. Çuaşlar çitännärgä sölge-külmäk elep borınğı moxitnı sürätlärgä köç quysalar, Aziä-Kafkaz, başqort xalıqlarınıñ kürgäzmäläre zur kolxoz bazarınıñ ber öleşen xäterlättelär, ä belorus üzläreneñ öställärenä rizıq östenä xämer dä quyğannar ide. Äytergä kiräk, buşqa küñel açırğa yaratuçılar biredä ayıruça küp ide. Ä menä tatar, alman, yähüdlär kürgäzmäsendä tik ruxi azıq qına ide, dip äytäse kilä. “Tuğan tel” cämğiäte häm Samara şähäreneñ milli-mädäni möxtäriäte oyıştırğan kürgäzmädä distälägän balalar ädäbiatı - “Sabantuy” gazetası, “Yalqın” jurnalı häm Qazanıbıznıñ 1000 yıllığına bağışlanğan ädäbiat. Bik küplärne tatar balaları öçen bizäkle kitaplar qızıqtırdı häm rus millätendägelär kitaplarnı xörmät belän qaradılar häm yaqınnarı, dusları, tuğannarınıñ Qazannıñ 1000 yıllığına baruları turında häm Tatarstan başqalasın maqtap-maqtap süz alıp bardılar.

Samar ölkäsendä “Duslıq tacı” 4-nçe märtäbä uzdı. Tik menä bıyıl bäyrämnän soñ tügäräk östäl dä oyıştırıldı. Milli citäkçelär, ğälimnär, Guberna Duma räise qatnaşında uzğan söyläşüneñ konkret teması da bilgele ide: “Milli ğoref-ğädätlärne, milli mädäniatnı saqlawda şäxeslärneñ öleşe häm urını” dip ataldı.

Şunısı quanıçlı buldı, mädäniat departamentı wäkile Pankratov äfände tatar milli xäräkätendäge ike şäxes - İlgiz Kälüç häm Azat Nadirov turında täfsilläp, iñ matur süzlär belän maqtap telgä aldı.

Söyläşüdä “Tuğan tel” direktorınıñ “Ölkäneñ möstäqil telerädiokompaniä buldıru” täqdimen barlıq citäkçelär dä xupladılar häm Guberna Duma räise bolay dip bäyäläde: “Ölkä radiotelekompaniäse ölkä ixtıyacların küzdä totıp eş itärgä tieş. Möstäqil ölkä radiotelekompaniäsen buldıru turında eş alıp baraçaqbız, bu bik matur täqdim. Bu bik kiräk närsä, radio, telekanalda kübräk milli mädäniatnı propagandalarğa kiräk. Üzebezneñ ruxıbıznı milli kulturalar belän bayıtmasaq bez çın millät qaharmannarı tärbiäli almayaçaqbız”- dide Guberna Duma räise Viktor Sazonov.

Bügenge köndä millätlär öçen iñ möhim mäsälä bulıp milli radiotapşırular qala. “Tuğan tel” direktorı ölkäneñ möstäqil, täwlegenä 24 säğät eşli torğan radiotelekanalın buldıru kiräklegen kütärde, Guberna Duma räise Viktor Sazonov bu fikerne xupladı. Bu proyıqt niçek tormışqa aşırılır, monısın waqıt kürsäter.

Şamil Bahawetdin, Samar

XS
SM
MD
LG