Accessibility links

шимбә, 10 декабрь 2016, Казан вакыты 11:50

Ramil Yunıs Qol Şärif mäçetenä kerüne tüläwle itügä qarşı


“Восточный экспресс” gäzite genä tügel, “Вечерняя Казань” gäzite dä şul xaqta xäbär itte. İldus Waxitov, “Qazan Kirmäne” tıyulığı citäkçese, ä Qol Şärif mäçete dä, Blagoveşçenie saborı da tıyulıqqa kerä, sentäber azağınnan mäçetkä tüläp kerergä yasawnıñ säbäplären añalata. Mäçet belän çirkäwne totu şaqtıy zur çığımnar sorıy ikän. Ä “Восточный экспресс”gäzite ğıybädätxanälärgä aqça tüläp kerü dönyada bulmağan xäl di. Azatlıq radiosı Qol Şärif mäçeteneñ imamı , Tatarstan möselmannarınıñ Ğölämälär şurası räise Ramil xäzrät Yunısqa möräcäğät itte. Ul isä, äle mäçetkä kerü buşqa di. Xäyer, mäğlümat çığanaqları ütkän düşämbedän kerü tüläwle bula disä dä. Ramil Yunıs:

Bügenge köndä tüläw yuq. Älbättä, mäçetkä tüläp kerü yasaw turında initsiativalar bar. Ämma, bez, din ähelläre, tüläwneñ mondıy formasına qarşı. Yäğni, bilet alıp, 20 sum tüläp mäçetkä kerüne bezneñ xalıq önäp betermyäaçäk. Bügenge kündä böten närsägä bäyä arta. Ä mäçetkä kilä äbilär, babaylar, invalidlar. Alar, ber doğa qılıp çığıym, äti-äniem ruxına doğa qılıym, xäzrätneñ wäğäzen tıñlıym, sälämätlek Xodadan sorıym dip kilä. Şunıñ öçen 20 sum tülätü matur äyber tügel. Yä bulmasa, küplär, namaz uqırğa dip könenä ike-öç märtäbä kerä. Bigräk tä studentlar. Alarğa, mäzäk tä inde, proezdnoylar kebek äyber yasatırğamı.

Bez, “Qazan Kirmäne” tıyulığına bu xaqta üz fikerlärebezne äyttek. Anı başqaça da yasap bula. YÄ Kirmängä kergändä, yä turistik firmalar arqılı, säyäxät bäyälärenä kertergä bula. Mäçetkä könenä ike-öç meñ keşe kilä. Bu iñ äz digändä. Ä iñ küp digändä, ul biş-altı meñ

Şulay itep, äle Qol Şärif mäçetenä tüläp kerü mä’säläse xäl itelmägän. Azatlıq xäbärçese mäçettä bulğanda anda kerü-çığu irekle, yäğni buşqa ide. Monnan tış, mäçet qararğa kilgän xalıq, xälennän kilgän yärdämne kürsätä kilä. Mäsälän, mäçetneñ farız zalın qarar öçen dürtençe qattağı balkonğa kütärelsägez, anıñ idännärendä 10-50 sumlıqlar, timer aqçalar cäyelep yata. Kilgän xalıq şulay itep, mäçetkä xäyer –sädäqasın tapşıra, yärdäm itä.

Räfis Cämdixan

XS
SM
MD
LG