Accessibility links

пәнҗешәмбе, 8 декабрь 2016, Казан вакыты 12:52

Mäxäbbät radiosı tatar telendä söylämäyäçäk


19 sentäberdän eşli başlağan yaña radio 107,8 yışlığında urnaşqan. Kön däwamında annan mäxäbbät turında cırlar tıñlarğa mömkin. Monnan tış, efirda şulay uq könenä 6 märtäbä 3 minutlıq cirle yañalıqlar, hawa torışı çığarılışları qaralğan. İrtäle-kiçle tıñlawçılar teläkläre buyınça cırlar tapşıru programması da bar. Älege radio turında bezgä anıñ general direktorı Vyaçeslav Lopatin tulıraq mäğlümät birde.

Xäzer Qazanda mäxäbbätneñ dä üz radiosı bar. Yaña ğasır kompaniäse yaña proyekt başlap cibärde – şähärdä küplär kötkän populyar radiostansiä eşli başladı. Bezneñ partner – Love Radio oçraqlı räweştä genä saylanıp alınmadı. Bez qazanlılar arasında ütkärgän soraşular näticäsendä eş ittek. Citmäsä bezdä näq menä şuşı formatta buşlıq sizelä ide. Xäzer Qazannıñ FM-efirında Rusiädä bulğan barlıq radioformatlar täqdim itelä. Matur, moñlı köylär yañğırata, zamança alıp barıla torğan Love radio qazanlılarğa yaratqan şähärneñ meñyıllığına bik äybät büläk buldı

Love Radio-Kazan stansiäseneñ general’ direktorı Vyaçeslav Lopatin süzlärenä qarağanda, yaña radionıñ efirında maxsus bäygedä ciñep çıqqan alıp baruçılar eşläyäçäk.

Qazanda 19 sentäberdän efirğa çığa başlağan Love Radionıñ tarixı inde uzğan yılnıñ azağında başlanıp kitte. Näq menä şuşı waqıtta respublika xökümäte yärdäme belän Mäskäwdä başqa efirğa çığarğa teläwçelär belän yarışıp, Tatarstan-Yanga ğasır kompaniäse tağın ber yışlıqqa iä buldı. Ul waqıtta küplär yaña - 107,8 yışlığında nindi radio, närsä turında, nindi teldä söyläwe turında farazlar yasadılar. Qayberäwlär, menä xäzer Yaña ğasır radiosı ber ük cirdän tatarça da, rusça da tügel, ä bersennän ber teldä, ikençesennän – ikençe teldä täwlek buyı efirğa çığaçaq, dimäk, tatar telendä genä söyli torğan tağın ber radio buldırılaçaq, dip şatlanğan ide. Läkin älege ömetlär aqlanmadı. Bu düşämbedä efirğa çığa başlağan Love Radio barı tik rus telendä genä söyläyäçäk häm anda rus häm çit tellärdäge cırlar ğına bulaçaq. Rus telle cırlar efirnıñ 40 protsentın täşkil itäçäk, qalğanı – başqa teldäge cırlar. Alar arasında tatar cırları bulmayaçaq, älbättä. Bu xaqta da bezgä Vyaçeslav Lopatin xäbär itte.

Şulay itep, Love radio rus telle bulaçaq. Yaña ğasır radiosınıñ efirında da älegä üzgäreşlär kötelmi. Bu zur, xätta säyäsi mäs’älä, min bernärsä dä äytä almıym, monı Yaña ğasır kanalı citäkçelegennän sorarğa kiräk, dide Vyaçeslav Lopatin. Älegä Qazanda tatar telendä efirğa çığa torğan tağın ber kanal turındağı xıyallar tormışqa aşmadı. Ä mäxäbbät turında tatarça cırlarnı täwlek buyı äle haman da barı tik Tatar radiosınnan ğına tıñlarğa mömkin.

Gölnaz İlgizär

XS
SM
MD
LG