Accessibility links

шимбә, 10 декабрь 2016, Казан вакыты 09:55

Munitsipal saylawlardan ni kötärgä?


Şähärlärdä, rayon üzäklärendä häm awıllarda eksperiment räweşendä munitsipal organnar eşläp kilüe berkemgä dä ser tügel. Ä xäzer isä älege munitsipal organnar tulı köçkä iä bulaçaqlar. Cirle üzidaräneñ elek saylanğan wäkälätle organı betä. Şuña da yaña orğan qabul itär öçen saylawlar kiräk bula. Munitsipal saylawlar cirle töbäklärdä bulğan problemalarnı xäl itü, alarğa yaqınraq kilü maqsatı belän eşlänelä. Älege saylawlarda xalıq üze kiräk dip tapqan, döresräge awıl, şähär keşeläre belän eşli alırlıq citäkçelärne saylıy.

Tatarstandağı rayon üzäklärendä munitsipal saylawlarğa äzerlek belän tulıraq tanışır öçen bez Balıq bistäse rayonı Küki cirle üzidarä räise Mäwlä İsxaqovqa möräcäğät ittek. Çönki rayon häm awıl keşeläre bu saylawnı rayon başlığı, yäki awıl sovetın saylaw dip kenä qabul itälär. Qısqası munitsipal saylawnıñ ni ikänen añlamıylar diärlek. Ä bezgä bulaçaq saylawlarnıñ üzençälegen Mäwlä äfände bolay añlattı:

Bu saylawlarnıñ üzençälege şunda, alğa taba üzidarä yäisä awıl cirlege dip atalaçaq inde ul bezneñ. Mäsälän Küki awıl cirlege bulaçaq. Monda kergän barlıq şäxeslärneñ salımnarı şuşında barırğa tieş inde. Xäzergä bu tögäl bilgele tügel, küpmeder däräcädä şuşı cirlekkä, küpmeder däräcädä rayonğa, küpmeder däräcädä respublikağa kitäçäk. Ä menä bügengese köndä, yäğni 2005 yılda kerem, cir, mölkät salımnarı cirle üzidarägä keräçäk. Qayda kolxozlar, sovxozlar, oyışmalar köçle – alar öçen bügenge moment qulay moment dip sanıym inde min.

Bu Balıq bistäse rayonı Küki cirle üzidarä räise Mäwlä İsxaqov süzläre ide. Ä menä Möslim rayonında 16 oktäberdä uzaçaq munitsipal saylawlarğa äzerlek turında bezgä älege rayonnıñ cirle üzidarä räise Nuraniä Äyüpova citkerde:

Bügenge köndä 10 saylaw okrugına bülende rayon üzäge. Şuşı 10 okrugtan 10 deputat saylanaçaq, 10 deputat urınına 28 kandidatıbız bar. Böten saylaw uçastokları eşkä kereştelär. Kizü grafigı buldırıldı. Xäzer inde alar saylawçılarğa mäğlümat taqtası äzerlilär. Şimbä, yäkşämbe könnärendä agitatorlar bezneñ cirlektäge saylawçılarnıñ isemlegen barladılar. 20 sentäberdän härber keşe isemleklär belän tanışa ala başlıylar.

Bu saylawlar närsä birer ikän digän sorawğa Nuraniä xanım bolay cawap birde:

Bez bit inde 2006 yılnıñ berençe ğinwarınnan yaña qanun nigezendä eşli başlayaçaqbız. Şuşı qanun nigezendä üzebezneñ östämälär belän ustav qabul ittek. Elekke ustavqa östämälär kerttek häm üzidarä buldıq bit inde bez. Menä şuşı üzidarä digän äyber küräseñ üzen-üze aqlap beterä almağandır. Qabul itelgän qanun buyınça cirlekkä, munitsipal'' berämleklärgä üzläre eşlärgä mömkinlek tudırıla. Ber yaqtan şulay bulsa, finans yaqtan qarağanda bu bezneñ qısalarnı bik nıq qısa. Çönki bez üz-üzebezne finanslarğa tieş bulabız. Bezgä mäsälän cir, fizik zatlardan mölkät salımı häm öleşçä kerem salımı qaldırıldı. Menä şuşı salımnar xisabına bez yäşärgä tieş.

Röstäm İsxaqi

XS
SM
MD
LG