Accessibility links

дүшәмбе, 5 декабрь 2016, Казан вакыты 21:42

Mixail Xodorkovski eşen qaraw haman kiçekterelä, xakimiatneñ moña açuı qabarına


Berniçä törle cinayät qıluı öçen 9 yıl törmä cäzasına xökem itelgän mäğlüm eşmäkär Mixail Xodorkovskineñ xökemgä qarşı şikäyäten tikşerü tiräsendä haman da protsedura uyınnarı däwam itä. Xodorkovski üzeneñ töp advokatı xastaxanädän çıqmıy torıp, üzen yaqlaw eşen yañartudan baş tarta. Ğäyepläw yağı isä, ul monı maxsus eşli häm qarşı şikäyät tikşerüne suzıp üzen Duma deputatına nämzät itep terkätergä teli dip belderä.

Mixail Xodorkovski eşen qaraw bu atnada da inde ikençe märtäbä kiçekterelde. Düşämbedä ul sişämbegä, ä sişämbedä - atnakiçkä qaldırıldı. Üzeneñ xökem qararına qarşı şikäyät belän çıqqan Xodorkovski, bu eşne qarağan Mäskäw şähär mäxkämäsennän, utırışlarnı barı tik anıñ töp advokatı Genrix Padva qatnaşında ğına ütkärüne taläp itä, ä älegä ul xastaxanädä yata.

Sişämbedä utırış tağın ike köngä, Mixail Xodorkovskidän ul könne Padva da, älegä çittä säfärdä bulğan ikençe advokat Yuri Şmidt ta mäxkämä utırışına kiläçäk digän yöklämä alğannan soñ ğına küçerelde. Anıñ advokatları belän prokuratura arasındağı mönäsäbätlär qatlawlı şaxmat uyının xäterlätä. Şul uyında mäxkämä yış qına däwlät ğäyepläwe, yäğni prokurorlar yağın ala. Düşämbedä, misal öçen, mäxkämä Padva urınına Xodorkovski başqa advokatların kiterergä tieş digän qarar çığarğan ide. Şundıy öç advokatqa - Anton Drel, Yelena Levina häm Denis Dyatlevkä inde, düşämbe utırışına kilep Xodorkovski eşen alu kürsätmäse dä birelgän bulğan. Radiobız xäbärçese belän söyläşkän Drel mäxkämäneñ şuşı qararın qanunğa sıymaslıq dip bäyäläde.

"Bügenge utırışnıñ näticäse şul - bar xoquqi normalar da bozıla. Advokatlarnı tıñlawlarda qatnaşuğa mäcbür itälär, gärçä Xodorkovski üze qarşı şikäyätne tikşerü eşendä barı tik Padva belän Şmidtnıñ ğına qatnaşuın telägän ide. Läkin mäxkämä başqa advokatlarnı, şul isäptän mine dä qatnaşuğa mäcbür itä häm monı Xodorkovski üze ütende di, ämma ul andıy üteneç belän çıqmadı, tıñlawlar açıq häm şöker, andağı härkem barnärsäne işetep tora", di Anton Drel.

Yuğarıda telgä alınğan öç advokat mäxkämä utırışına kilsä dä, urtaq belderü bäyän itep Xodorkovskine, anıñ üz üteneçen iskä alıp, bu eştä yaqlamayaçağın äytte. Prokuror Dmitri Şoxin bu atnada Mixail Xodorkovski häm anıñ advokatların mäxkämä utırışın añlı räweştä suzarğa mataşuda ğäyepläp çıqtı. Ä qarşı yaq isä kiresençä, prokuraturanı eşne aşıq-poşıq qına qararğa tırışuda ğäyepli.

Qarşı şikäyäten tikşerüne äkrenäytü Mixail Xodorkovski faydasına - mäğlüm ki, ul üzeneñ Däwlät Dumasına saylanırğa teläwen häm Mäskäw şähärendäge ber bülgedä 4-nçe dikäbrdä uzaçaq tawış birüdä nämzät bularaq çığarğa cıyınuın äytkän ide. Ä monı isä ul üz eşeneñ appelätsiäse barğan oçraqta ğına eşli ala, xökem qararı tulısınça ğämälgä kergännän soñ anıñ saylanu xoquqı inde bulmayaçaq. Xodorkovski üzen nämzät itep terkäw eşen başlap ta cibärde. Cirle saylaw komissiäse anı älegä terkämäde, çönki anda Xodorkovski imzası bulğan ğariza alınmadı dip belderälär. Advokatlar äytüençä, andıy ğariza törmä poçtası belän uzğan pänceşämbedä kitkän, barı tik xakimiat kenä moña törleçä qomaçawlarğa tırışa ikän.

Alay ğına da tügel, Xodorkovski häm anıñ advokatları uzğan sişämbedän birle üzläreneñ küreşä almawına, moña törle kirtälär qorıluına zarlana. Düşämbe könne Xodorkovski, xakimiatneñ monı niçegräk eşläwen bolay sürätläde:

"14-nçe sintäbr utırışınnan soñ, inde irtägäsen ük bezneñ qattağı 10 zindannıñ 3-e aşa yoğışlı awırulı ber totqınnı ütkärdelär. Soñraq anı başqa cirgä aldılar. Sez monı oçraqlı ber närsä dip bäyälärsez, läkin şul 3 zindannıñ bersendä min idem, Platon Lebedev ikençesendä ide, inde ikençe könne ük alarnı karantinğa quydılar häm minem advokatlarımnı kürü, alardan nindi dä bulsa mäğlümat alu mömkinlege bulmadı", dip sürätli xakimiat mäkeren Mixail Xodorkovski.

Küzätüçelär, anıñ Duma deputatı bulu ixtimalı yuq disä dä, qanun nigezendä nämzät bularaq terkäwgä ireşü dä Mixail Xodorkovski öçen zur ciñügä äylänäçäk dip isäpli.

Kärim Kamal
XS
SM
MD
LG