Accessibility links

сишәмбе, 6 декабрь 2016, Казан вакыты 05:48

Qazannıñ Bogoyavlenie çirkäwendä Rusiä däwläte oyışuına 1143 yıl tulunı bilgeläp üttelär


Böten Rusiä buylap bu könnärdä Kulikovo suğışınıñ 625 yıllığın bäyräm itälär. Bu çaralarda Rusiä patriarxı Aleksiy II dä qatnaşa. Ul da Kulikovo qırında bulıp, çuqınıp häm çuqındırıp qayttı. Ğomumän, pravoslav çirkäwe Rusiä tarixına bäyle waqiğalarğa ayıruça zur iğtibarlıq kürsätä soñğı arada. Qazanda isä tantanalar Kulikovo suğışı uñayınnan ğına tügel, ä başqa ber tarixi waqiğanı iskä alıp ta ütte. 21 sentäberdä şähärneñ Bogoyavlenie çirkäwendä Rusiä däwläte oyışuına 1143 yıl tulu uñayınnan liturgiä häm Xac yörü çaraları buldı. Rusiä ğalimnäre arasında ilneñ qayçan häm niçek başlanıp kitüe turında törle farazlar bulsa da, Tatarstanda, ayırım alğanda çaralarnı uzdıruçı Bogoyavlenie çirkäwe ataqayı Oleg Sokolov fikerençä, Rusiä 862 yılda Ryurik xakimiätkä kilgännän soñ tözelgän, dip sanıylar. Berençe märtäbä älege datanı 1862 yılda patşa xakimiäte Novgorodta bäyräm itkän. Älege ğörefne Qazanda däwam itärgä buldılar häm soñğı berniçä yılda Oleg ataqay tırışlığı belän tantanalı çaralar daimi ütep kilä. Oleg Sokolov bu könne xätta Rusiä köne itep räsmi räweştä bilgelärgä täqdim itä. Xalıq älege çaralar xaqında bik ük xäbärdar tügel, härxäldä tantanalarda keşe ällä ni küp qatnaşmadı. Ä tatar milli xäräkäte wäkilläre bu çaralar turında ni uylıy soñ… Tälğät Bariev fikerläre.

Tatarstanda, Qazanda Rusiä däwläteneñ oyışuına 1143 yıl tulunı bilgeläp ütü bik säyer tıyıla miña. Min monı din bitlege astında uzdırılğan säyäsi provokatsiä dip bäyälär idem. Asılda, bu Tatarstan häm tatar xalqı däwlätçelegenä qarşı yünältelgän çara. Çönki räsmi räweştä Rusiä däwläteneñ başı bötenläy ikençe waqıttan isäplänä häm ul başqa cirlekkä nigezlänä. Şunısın da äytergä kiräk, slavyannar ul waqıtta mäcüsilär bulğannar, dimäk Rusiä pravoslav çirkäweneñ bu waqiğalarğa ni qatnaşı bar… Busı da bik säyer närsä

Şulay itep, Qazannıñ yubileyın bäyräm itü belän genä Tatarstanda meñyıllıqlarnı iskä alu tämamlanmadı.

Gölnaz İlgizär

XS
SM
MD
LG