Accessibility links

Кайнар хәбәр

Mostay Kärim cenazasında Tatarstan wäkilläre dä qatnaşaçaq


Mostay Kärimneñ wafat buluı turında xäbär tatarstanlılarğa da qayğılı xislär alıp kilde. Tamaşaçılar, äle cäy başında ğına yazuçınıñ «Ozın, ozaq balaçaq» romanı buyınça quyılğan säxnä äsären qarağan ide. Älege äsär «Näwrüz» teatrlar festivalendä kürsätelde. Mostay Kärimneñ Qazanğa soñğı kilüen dä küplär xäterli. Ber yıl elek, ul Rinat Xarisqa xalıq şağire iseme birelü uñayınnan Qazandağı çaralarda qatnaştı. Şul uq arada, Mostay Kärim Tatarstan Prezidentnı belän dä oçraşqan ide. Şul oçraşudan soñ, yazuçı jurnalistlar sorawlarına cawap birde. Bezneñ dä arxivta, Mostay Kärimneñ tawışı saqlanıp qaldı. Xäzer bezneñ, yazuçınıñ isän çaqta äytkän fikerlären işetü mömkinlegebez bar. «Min ğömer buyı başqortça yazdım. Äsäyem yağınnan min başqort, ätiem yağınnan näseldä tiptärlär, tatarlar bar. Läkin monda problema bulmadı. Perestroyka citkäç minnän sorıy başladılar, sez tatarmı, başqortmı. Min Mostay Kärim. Oşaymı sezgä ,yuqmı? Oşasa uqımağız minem äsärlärne, oşasa – uqığız.»- dip äytkän ide Mostay Kärim.Tatarstan Prezidentı matbuğat üzäge xäbär itkänçä, Mintimer Şäymiev Başqortstan Prezidentı Mortaza Räximovqa räsmi telegramma cibärep, başqort xalqınıñ olı qayğısın urtaqlaşqan. «İnternatsional ädipneñ äsärlärendä här xalıq, här keşe üzenä ruxi baylıq taptı, anıñ ürnägendä kiñ küñellelek, tolerantlıq, keşeleklelek tärbiäläde»,- dielä telegrammada. Tatarstan parlament räise Färit Möxämmätşin dä, ädipneñ wafatına qarata fikeren belderde: «Tanılğan yazuçı häm dramaturg Mostay Kärimneñ ülüe, bezneñ öçen zur yuğaltu. Ul Tatarstan häm Başqortstan xalıqlarınıñ duslığına ayıruça zur öleş kertän keşe.» Tatarstan yazuçılar berlege räise İlfaq İbrahimov Tatarstan ädipläre isemennän belderü yasadı.« Mostay Kärim çorıbıznıñ iñ zur şağire, ul başqort xalqı öçen dä, tatar xalqı öçen dä olı qäläm iyäse ide. Bu xäbärne zur yuğaltu itep qabul ittek. Mostay Kärimne tatar yazuçıları üzläreneñ ostazı itep qabul itkännär ide. Anıñ icatı, äsärläre äle qalaçaq, digän küñeldä ömet bar».

Mostay Kärim comğa könne, Ufada cirlänäçäk. Cenazada qatnaşu öçen Ufağa Tatarstannan räsmi delegatsiä bara. Tatarstan prezidentı isemennän yazuçı qäberenä bäyläm quyılaçaq. Tatarstanlardan, yazuçını soñğı yulğa, parlament räise Färit Möxämmätşin, şağirlär Robert Miñnullin häm Rinat Xaris, yazuçılar berlege räise İlfaq İbrahimov ozataçaq.

Bikä Timerova.

XS
SM
MD
LG