Accessibility links

җомга, 2 декабрь 2016, Казан вакыты 23:06

Millätpärwär ğalim Wağiz Fätxullin wafat buldı


21 sentäber çärşämbe könne tözeleş häm arxitektura universitetınıñ tözeleş fakultetınıñ dekanı Fätxullin Wağiz Şäyxulla ulı yul qazasına oçrap, wafat buldı. Wağiz äfände tatar zıyalıları arasında bilgele häm alıştırğısız şäxes ide. Tatarstan xökümäte qarşındağı tatarstan xalıqları tellären saqlaw häm üsterü komitetı, däwlät sovetı, Bötendönya tatar kongressı başqarma komitetı häm tatarstannıñ yuğarı mäktäpläre Wağiz Fätxullinnıñ täcribäsenä tayanıp barlıq uqu yortlarında da tatar tele bülekläre açarğa omtıldılar. Näq anıñ başlanğıçı buyınça Qazan tözeleş häm arxitektura universitetında tatarça texnik belemnärne uqıtu bülege açılıp, anda tatar awıl mäktäplären tämamlağan yeget häm qızlar tuğan telebezdä yuğarı belem aldılar.

Professor Fätxullin Wağiz Şäyxulla ulı tözeleş häm arxitektura universitetın 20 yıldan artıq tözeleş fakultetında dekan bulıp eşläde. Anıñ xezmättäşläre, bulaçaq tözüçelär äzerläwçe uqıtuçılar tözeleş universitetına milli rux qına tügel, ä tabiği fännärne tuğan teldä uqıtu ışanıç nığıttılar. Bu uqu yortında eşläwçe ğalimnärneñ tatar telendä matematika, sızma, geometriä, tözeleş buyınça tatarça däresleklär äzerläwe oçraqlı tügel. Wağiz Şäyxulla ulın xezmättäşläre, uquçıları da, ata – analar da xörmät itälär. Qayğılı xäbärne bezgä tözeleş universitetında uqığan ike igezäk İlnar häm İldar Zöbäirovlarnıñ ätiläre Räfiq äfände citkerde.

“Ul bezneñ öçen bik täcribäle, saf küñelle häm keşelekle tatar abzıyı bulıp tordı. Wağiz äfändeneñ wafat buluı universitet öçen zur yuğaltu. Anıñ turında istälek bezneñ yöräklärdä mäñge saqlanaçaq. Äybät keşelär bezneñ aradan bik tiz kitälär şul”.

Räfiq Zöbäirov iñ berençelärdän bulıp şuşı faciğanıñ millät öçen zur yuğaltu buluın añlağan. Bez universitetqa şaltıratıp Fätxullin Wağiz şäkertlären tabarğa tırıştıq, di. Telefonğa teoretik mexanika kafedrası aspirantı Tahir Xämitov kilde. Ul tözeleş universitetına Başqortstannıñ Bişbüläk rayonnan kilep uqırğa kergän, tatar bülegen uñışlı tämamlap, xäzer üze dä studentlarğa sabaq birä. Ostazınıñ häläkäten Tahir awıl kiçerä.

“Uqıtqanda Wağiz Şäyxulla ulı däreslärne bik qızıq häm küñelle itep alıp bara ide. Ul bezgä üzeneñ 80 yıllarda Aljirda fransuz telendä uqıtuın söyli ide. Min üzem anıñ uquçısı häm xäzerge waqıtta teoretik mexanika kafedrasında aspirant - assistent bulıp eşlim”.

Wağiz Fätxullinnıñ tuğannarınıñ häm duslarınıñ qayğısın milli täräkqıät eşendä qatnaşqan bik küp zıyalalar urtaqlaşa. Märxüm belän sawbullaşu comğa könne 9.30da tözeleş häm arxitektura universitetı binasında bulaçaq.

Gölnaz Şäyxetdinova

XS
SM
MD
LG