Accessibility links

Кайнар хәбәр

Ukraina parlamentı Yuri Yexanurovnı yaña xökümät citäkçese itep rasladı


Atnakiçtä Ukraina parlamentı xökümät citäkçese urınına prezident Yuçenko täqdim itkän namzätne rasladı. İke kön elek bulğan tawış birüdä Yuri Yexanurovqa 3 tawış citmi qalğan ide. Uzğan töndä prezident säyäsi törkemnär belän söyläşülär ütkärgännän soñ Yexanurov citärlek tawış qazandı. Bu urında ul wazifasınnan çitlätelgän Yulia Timoşenkonı alıştıraçaq.

Atnakiç Yuğarı Radada ütkän tawış birüdä Yuri Yexanurov 289 deputatnıñ tawışın qazandı. Raslanu öçen kimendä 226 tawış kiräk ide. Sişämbe tawış birüdä Yexanurovqa 3 tawış citmi qaldı. Uzğan töndä prezident Yuçenko qarşı tawış birgän säyäsi törkemnär belän berniçä säğät söyläşülär alıp bardı. Küräseñ, monıñ näticäse bulğan. Xättä Yuçenkonıñ prezident saylawlarında köndäşe Viktor Yanukoviç totrıqlı xökümät xaqına eşlärgä äzerlek belderde:

"Parlamenttağı köçlär koalitsiä tözergä, häm bu xökümät öçen cawaplılıqnı prezident belän büleşergä äzer."

Soñğı ike atna barğan säyäsi tartqalaşular Ukrainanı yänä büleneş xälenä kiterde. Atnakiç tawış birü aldınnan prezident Yuçenko bar taraflarnı qabat berdämlekkä çaqırdı:

"Min bar säyäsi citäkçelärgä, sivil häm eşquar dairälärgä möräcäğät itäm: bezgä suğış qılıçın yıraqqaraq yäşerergä häm anıñ qayda ikänen onıtırğa."

Premier wazifasınnan çitlätelgän Yulia Timoşenkoğa yaña xakimiättä urın tabılrmı, äytüe qıyın. Çärşämbedä ul bulğan qarşılıqlarnı çitkä quyarğa äzerlek belderde:

"Koalitsion xökümät tözü – kön üzägendä. Anda Ukrainanıñ bar säyäsi köçlären wäkillek itkän preofessionallar kerergä tieş. Çönki bügen Ukraina berdämlekkä moxtac."

Urın tabılmağan xäldä Timoşenko kiläse yılnıñ Martında ütäçäk parlament saylawlaırna äzerlänä başlıy ala. Bu saylawlar ayıruça äxämiätle bulaçaq, çönki Konstitutsiägä kertelgän üzgäreşlär näticäsendä prezidentnıñ küp kenä wäkälätläre parlamentqa küçä.

Xäyer, Martqa qädär äle waqıt bar, älegä Ukrainanıñ yaña premierı buldı. Çığışı belän buryat, Dnepropetrovskida ölkä xakime bulıp eşlägän Yuri Yexanurov ciñ sızğanıp eşkä kereşmäkçe:

"Bezneñ çayqalıp torırğa waqıt yuq. Xökümätneñ kimendä 3\1e säyäsättän yıraq keşelär bulaçaq. Alar ilebezdäge konkret mäsälälärne xäl itü öçen eşliäçäk."

Şulay itep, säyäsi cancal xäl itelde sıman. Ämmä krizistan ciñep çığuçılar kürenmi, yuğaltular isä citärlek, berençe çiratta Äflisun İnqilabı di, bu turıda kitap yazıp yatuçı Ukraina belgeçe Askold Krushelnicky:

"Äflisun İnqilabın xuplağan Ukrainnarnıñ kübeseneñ küñele qayttı. Bu yämsez qılanışlar, qomsızlıq İnqilab alıp kilgän ömetlärne yuqqa çığardı."

Prezident älegä urınında qaldı, ämmä anıñ abruyına da zıyan kilde. İxtimal aña äle Berezovski aqçaları turındağı sorawlarğa cawap birergä turı kiläçäk. Timoşenko soñğı minutta yözen saqlarğa tırışsa da, anıñ da abruyına tap töşte.

Şulay da bu waqiğalarnıñ çın qorbanı – xalıqtır. Dikäber salqınında Maydanda basıp torğan meñlägän keşelär. Xäyer, kiläse yılnıñ martında alarnıñ üz süzen äytergä forsatı bulaçaq.

-Ali Gilmi
XS
SM
MD
LG