Accessibility links

шимбә, 10 декабрь 2016, Казан вакыты 06:12

“Biyü bombası” şartladı


Kiçke tuğızda başlansa da “Piramida” işek töbendäge çirat tönge unberlärgä qädär däwam itte. Ä biyü mäydanınıñ üzendä yegetlär qızlar ber-bersen etä-törtä, alıp baruçılar - “Tatar radiosı” di-djee Bulat Bäyrämov belän yaña ğına eşli başlağan yäş di-djey Ğölnaz säxnägä täqdim itep çığarğan yäş cırçılarnıñ cırlarına biep küñel açtılar. Şulay uq Mäskäwneñ “Qunaq” tatar yäşläre klubınnan yäş cırçı İsmal belän populyar tatar cırlarına remikslar, biyü köyläre yasawçı di-djey Radik Yarullin da “Biyü bombası”na kilgän yäşlärne sikertep biette. Älege çarada “Tatarstan yäşläre” gazetasında “tamaşa” säxifäsen alıp baruçı, şou-bizness ölkäsen yaqtırtıp baruçı jurnalist Danil Säfärov ta bar ide. Bez annan älege “Biyü bomba”sı turındağı fikerläre belän urtaqlaşuın soradıq.

- Älege çaranıñ üzençälege buldımı?

- Äye, buldı. Ber biyü mäydançığına 20 yaqın cırçını cıya aldı. Dizayn häm cırçılarnıñ törle tempta cırlawları da üzençälekle ide.

- Diskätükneñ alıp baruçılarına ni diärsez?

- Ğölnazğa kilgändä, ul äle “Tatar radiosı”nda yaña ğına eşli başladı. Tawışı buyınça tanıy başladılar inde, menä “Biyu bombası”nda üzen dä kürdelär. Minemçä äybät häm qızıq itep alıp bardı.


“Bars Media”nıñ general prodyuserı, tanılğan yäş cırçı Färit Taişov älege diskätükne oyıştıruçılarnıñ berse bularaq berniçä soraw belän möräcäğät ittek:

- Färit äfände “Biyü bombası”nıñ maqsatı nindi?

- Çirattağı ütkärelgän tatar diskotekası dip äytergä bula. Bez mondıy diskotekalarnı ay sayın ütkärergä cıyınabız.

- Çığış yasawçı cırçılarnı maxsus saylap aldığızmı?

- Maxsus dip äytü döres bulmas ide. Törle cırçılar yäşläre dä häm inde populyarlıq qazanğannarı da buldı tanılğannarı.

- Tatarça diskotekalarnı yışraq ütkärergä uylamıysızmı?

- Yışraq dip ayğa ber ütkärsäk dip uylap torabız. Oktäber ayında şundıy ber zur tatar diskotekası ütkärergä niätlibez. Tögäl qayçan bulası älegä bilgesez.

- Qazannıñ iñ zur tönge klublarnıñ berse bulğan “Arena”da tatarça diskätük ütkärügä niçek qarıysız?

- Bezneñ inde “Arena” da ütkärgänebez bar ide. Dekaber ayında, döresräge yaña yıl aldınnan uzdırırğa uylıybız.


“Biyü bomba”sında yäşlärne bietkän di-djee Radik ta Qazanda ütkän diskätüklär turında fikerlären citkerergä aşıqtı:

- Piramida”da uzğan “Biyü bombası” miña bik oşadı. Bik küñelle buldı, yäşlärgä dä küñelle bulğandır dip ışanam.

Radik di-djey buludan tış cırlar da yaza häm şul cırlarnı üze başqara da.

Röstäm İsxaqi

XS
SM
MD
LG