Accessibility links

якшәмбе, 11 декабрь 2016, Казан вакыты 03:33

Tatar Qurçaq Teatrı Berençe Märtäbä Samarda


Samarda sentäberneñ untuğızınnan yegerme öçenä qädär İdel buyı töbägeneñ qurçaq teatrları festivale uzdı. “Salawat küpere” isemen alğan festival' tatar, çuaş, muqşı, başqort, rus teatrların eçenä aldı. Festival' milli bayraq astında uzsa da tik Qazan qurçaq teatrı ğına üzeneñ “Qamır batır” isemle spektaklen tatar telendä kürsätte. Ufa, Çabaqsar, Saransk qurçaq teatrları gastrol'gä milli temağa yazılğan rusça uynala torğan spektakl'lär alıp kilgännär. Festival'ne Qazan qurçaq teatrı açıp cibärde. Festival' çın bäyräm tösen alsın öçen citäkçelär barçasın da eşlägännär. Foyeda tatar, çuaş, başqort, rus poçmağın xäterlätkän ädäbi kürgäzmä oyıştırılğan. Tatar poçmağı tatar balalar ädäbiäte belän tirän mäğnäle itep bizälgän, monda “Bişek cırları”da, “Salawat küpere”, “Yalqın” jurnalı da, “Sabantuy” gäcitçäse, äkiätlär dä urın alğannar.

Foye urtasında balalar başqaruında milli cırlar yañğırap tordı. Festival'ne tantanalı itep açqanda Samar ölkäseneñ mädäniät häm yäşlär säyäsäte ministrı Ol'ğa Rıybakova teläkläre yañğıradı.

“Qamır batır” äkiäten kürsäter aldınnan teatrnıñ rejisserı İldus Zinnurov, teatrnıñ direktorı Roza xanım Cabbarovalar çığış yasadılar. Zalda utıruçı bala-çağalarğa, ata-analarğa möräcäğät itep Qazan qurçaq teatrı direktorı Roza Cabbarova bolay dide:

“Qäderle millättäşlärem! Bügen bez çın küñelebezdän şatlandıq, çönki üzebezneñ millättäşlärebezgä “Qamır batır” äkiäten kürsätäbez, bu tatar xalqınıñ bik bilgele äkiäte. Tuqayıbıznı iskä töşersäk:”Teatr - yaqtılıqqa, nurğa iltä”,- digän. Çınnan da, sez qurçaq teatrı spektakl'lären qarap ütsägez, Sez aqnı qaradan, yaxşını yamannan ayırırğa öyränersez.

Qazanıbızğa avgustnıñ utızında 1000 yıl buldı. Bäyrämgä bik küp qunaqlar kilgän ide. BDB illäre citäkçeläre belän Rusiä Prezidentı Vladimir Vladimiroviç Putin da kilgän ide. Qazanıbız bik maturlandı. Qazan sezneñ tuğan yortığız, Qazanğa kilgäç Kreml'ne, Qol-Şärif mäsceden kürmi kitmägez.”

Samar tatar balaları ğömer başlarında saf tatar telendä qurçaqlar uynawın qaradılar, “Tuğan tel” cämğiäte direktorı, zaldağılarğa möräcäğät itep, menä mondıy fiker äytte: “Dürt milli töbäktän kilgän qurçaq teatrları arasında tik tatar balaları ğına üz tellärendä spektakl' qarıylar, qalğannarı spektakl'lären rus telendä uynıylar. Dimäk, Samar tatarlarınıñ kiläçäge bar äle. Bügen zalda utıruçı balalar - Samar tatarlarınıñ kiläçäk zıyalıları. Küñel türegezdäge märxämätlelek, miherbanlıq orlıqları ğömer yulığız buyına saqlansın ide”,- dide “Tuğan tel” citäkçese.

Qazan qurçaq teatrı rejisserı İldus Zinnurov üzeneñ çığışında şığrım tulı zalğa: “Min “Azatlıq” radiosı dulqınında Samar xäbärlären daimi tıñlap baram dip äytüenä- zal döberdätep qul çaptı.

Şamil Bahautdin, Samar.

XS
SM
MD
LG