Accessibility links

шимбә, 10 декабрь 2016, Казан вакыты 13:51

Mixail Xodorkovski advokatları ezärleklänä


Mäskäwdäge şähär mäxkämäse Mixail Xodorkovski advokatlarınıñ xökemgä qarşı şikäyäten kire qağarğa buldı, ämma berük waqıtta anıñ törmä cäzasın 9 yıldan 8-gä genä qaldırdı. Xäzer inde şuşı tanılğan totqınnıñ advokatları appelätsiäne yuğarıraq buınğa birergä cıyına. Rusiä xakimiate ul arada Xodorkovskine yaqlaw törkemen cimerergä buldı kebek - andağı çit il advokatlarınıñ bersenä ildän kitü ämere birelde, tağın tuğızına isä advokat bularaq eşläw xoquqınnan mäxrüm itü yanawı cibärelde.

Berniçä märtäbä kiçekterelgännän soñ mäxkämä utırışı pänceşämbedä nihayät ütte häm şul uq könne Mixail Xodorkovskineñ qarşı şikäyäten kire qaqtı. Däwlät yağınnan ğäyepläwne yaqlağan Dmitri Şoxin mäxkämä qararınnan qänäğät qaluın belderde:

"Appelätsiä mäxkämäse qararınnan bez älbättä qänäğät, ä inde xökem itelgännärgä cäza ozınlığı qısqartılğan ikän, monısı mäxkämä eşe", di prokuratura wäkile Şoxin.

Mäskäw şähär mäxkämäse Xodorkovski şikäyäten kire qağu belän, anıñ häm Platon Lebedevneñ törmä cäzasın ber yılğa qısqarttı, anı 8-gä genä qaldırdı. Şuña da qaramastan, Mixail Xodorkovskineñ advokatları mäxkämä bu eşne añlı räweştä aşığıp tikşerde, anıñ qararı däwlät ğäyepläwe yağın ala dip belderä. Alarnıñ berse Yuri Şmidt radiobızğa bolay dide:

"Min şunı ğına äytä alam - bu bar qanunilıqnı, ğäyeplängänneñ xoquqların, häm anı yaqlaw yağınıñ xoquqların da mısqıllaw buldı", di Xodorkovski advokatı Yuri Şmidt.

Ul häm anıñ xezmättäşläre cäza ozınlığın qısqartunı da tänqitli, çönki mäxkämä monı üzeneñ ğäyepläw yağın aluın qaplar öçen genä eşläde dip isäpli. Xodorkovski appelätsiäsen kire qağu anı xäzer çın mäğnädä totqın itä häm YUKOSnıñ elekke başlığı beldergän teläkkä - dikäberdä Däwlät Dumasına saylanu niätenä kirtä quya. Anıñ advokatları xäzer appelätsiäne Rusiäneñ Yuğarı mäxkämäsenä birergä cıyına, ä inde eş anda da uñmasa Yewropanıñ Strasbourgtağı keşe xoquqları mäxkämäsenä kitäçägen äytä.

Läkin Rusiä xakimiate moña inde xäzerdän ük üzençä yul quymasqa tırışa - Mixail Xodorkovskineñ advokatlarına qarşı qırıs çaralar kürelä. Pänceşämbe könne mäxkämä utırışı tämamlanuğa berniçä säğät ütü belän Rusiä xakimiate Londonda eşläwçe Kanada advokatı Robert Amsterdamnıñ vizasın ğämäldän çığardı häm aña ber täwlek eçendä ildän kitü ämeren birde. Amsterdam, bilgesez keşelärneñ comğağa qarşı töndä anıñ qunaqxanä bülmäsenä kilep, yä ildän kitäsez, yä qulğa alınaçaqsız dip äytüen xäbär itte:

"Mine yaqınça tönge berdä uyatıp, 5 keşe, alar FSB-dan bulğandır dip uylıym, pasportımnı soradı. Alardan, min qulğa alındımmı dip sorağaç, yuq digän cawap kilde, läkin alar mine militsiä bülgesenä alıp kitärgä teläde. Min qatği töstä baş tarttım, şunnan soñ alar minem pasportnı qarap, minem viza qağidälären bozuımnı belderde, monı kire qaqsam da, miña 24 säğät eçendä ildän kitü ämere birelde", di Xodorkovskineñ çit ildäge advokatlarınnan berse Robert Amsterdam.

Moñardan tış, tağın öç advokat - Yelena Levina, Anton Drel häm Denis Dätlov Rusiäneñ yustitsiä ministrlığına çaqırtılğan, Levina radiobızğa, bu alarnı advokat bularaq eşläw xoquqınnan mäxrüm itü öçen eşlänä, dip äytte:

"Bez äñgämägä dip Rusiäneñ yustitsiä ministrlığına çaqırıldıq, telefon aşa söyläşüdän añlawıbızça, alardan bezneñ xoquqi eşçänlegebezne tuqtatu turında täqdim yasawnı telägännär", di Xodorkovski advokatı Yelena Levina.

Comğa könne Rusiä prokuraturası çınnan da üzeneñ şundıy üteneç belän möräcäğät itüen rasladı, ul Mixail Xodorkovski eşe belän şöğellängän barlığı 9 advokatnı eşennän mäxrüm itüne alğa sörä.

Kärim Kamal
XS
SM
MD
LG