Tatnetta yäşi, aralaşa, anı tözüdä qatnaşa torğan keşelär, soñğı könnärneñ iñ zur yañalığı itep, berençe tatar-rus on-line süzlegeneñ eşli başlawın atıylar. İnternet aşa eşläwçe elektron süzlekneñ äzerlänüe, anıñ eş prinsipları turında söylägän idek inde. Bu proyekt turında, anı eşlägän keşe, Timur Kaşayıv, Qazanda ütkän Tatnetçılar cıyında da xäbär itkän ide. Timur Kaşayıv, ul waqıtta, üzeneñ süzlege belän, cıyılışta qatnaşuçılarnı tanıştırdı. Entuziastlardan häm däwlättän yärdäm soradı, proyektnı buşlay qullanuğa çığarırğa cıyınuın äytte. Inde, proyekt internetqa çıqtı häm anıñ belän xäzer här kem qullana ala. Adresı ğadi www.suzlek.ru Bu nindi süzlek häm anı niçek qullanırğa disezme? Süzlek, kompyuter yanınnan kitmiçä genä, urısçadan tatarçağa häm kiresençä tärcemä itärgä bula. On-line süzleklär internet öçen yaña äyber tügel, ämma daimi eşläwçe häm şundıy bay tatarça süzleklär yuq ide äle. Proyektnı eşlägän Timur Kaşayıv, tatar telen, 7 törle älifbada täqdim itä. Alar arasında tatarça kurilça, 5 törle latin älifbası, tağın berse – ğäräpçä bar. Tağın urısça älifba da täqdim itelä. 5 törle latin älifbası ul, ber törkem cämäğät eşlekleläre internetta eşläp çığarğan «İnalif» älifbası, «İnalif»nıñ tağın ber variantı, «Yañalif», «İntertat» agentlığı qullana torğan latin xärefläre häm «Azatlıq» radiosı saytındağı latin älifbası täqdim itelä. Sezneñ kompyuterığız uqıy ala torğan häm küñelegezçä xuş kilä torğan älifbalardan saylaw mömkinlege biredä. Süzlekkä 8369 süz, 2974 äytem, 1475 frazeologizm kertelgän, dielä. Barlığı 1317 süz tärcemä itelgän ikän. Süzlekneñ eş prinsipları ber qaya da yazılmağan, qullana başlağançı, beraz künärgä, cayın belergä kiräk. www.süzlek.ru saytın açqannan soñ, küz aldığızğa kiräkle süzne kertä torğan yul çığa, anıñ astında, tatar xärefläre birelä. Ber ük süz, sezgä, «inalif», «azatlıq» , «intertat» latinı misalında täqdim itelergä mömkin.
Süzne tizräk häm ğomumän tabır öçen, bu süzlekkä, anıñ tamır öleşen, gomumän qısqaraq itep kertergä qulayraq bulır.
Mäsälän, «maturım» süzen süzlek bazasında taba almadı, anıñ qarawı, «matur» süzeneñ tärcemäsen täqdim itte.
www.süzlek.ru turında teläk täqdimnäregezne äytep qaldırırğa teläsägez, şuşında uq fikeregezne «qunaq kitabında» yazıp qaldıra alasız, tekstlar cibärä alasız, avtorlarğa soraw birergä dä bula. www.süzlek.ru proyektınıñ avtorı - Timur Kaşayıv isemle, Mäskäw yegete. Anıñ belän aralaşırğa teläsägez, anı tatar forumnarında ezläp qarağız. Mäsälän ul, forum.tatar.info digän internet säxifägä kerä häm andağı söyläşülärdä yış qatnaşa.
Bikä Timerova.
