Bu könnärdä Sarıtawda islam dinenä bäyle berniçä qızıqlı häm möhim waqiğa buldı. Şularnıñ berse – 22 sentäberdä şähärdä uzğan xalıqara fänni-ğämäli konferensiä. Ul İslamnıñ Altın urtalıq prinsibı – tormışqa dip ataldı. Törle illärdän häm Rusiä töbäklärennän islam belgeçlären, ğalimnärne, din eşleklelären cıyğan älege fänni cıyılış turında tulıraq mäğlümät alır öçen bez İdelbuyı möselmannarı diniä näzaräte citäkçese Möqätdäs xäzrät Bibarsovqa möräcäğät ittek. Azatlıq radiosı tıñlawçılarına ul menä närsälär söyläde.
Älege konferensiäne bezneñ Diniä näzaräte, Kuväytnıñ dini oyışmalar ministrlığı oyıştırdı. Bezgä şulay uq ölkä xakimiäte dä bulışlıq kürsätte. Anda kütärelgän mäs’älälär arasında – islam dinendä bulğan reformalar. Bu xäzerge köndä bik aktual’ mäs’älä, alar bulırğa tieşme, üzgäreşlär bulsa, alar nindi bulırğa mömkin. Döresräge, monda süz üzgäreşlär turında tügel, yañarışlar turında barırğa mömkin. Konferensiädä Kuväyt, Söğüd Ğäräbstanı, Tatarstan, Başqortstan, Mäskäw, Tönyaq Kavkazdan din belgeçläre, din eşlekleläre qatnaştı
Sarıtaw ölkäse gubernatorı Pavel İpatov konferensiä çığış yasap, ölkädäge dinara mönäsäbätlär, alarnıñ dustanä buluı xaqında söylägän häm barça qunaqlarnı yaqınlaşıp kilüçe Ramazan ayı belän qotlağan. Çığış yasawçı ğalimnär häm belgeçlär Rusiä möselmannarınıñ xäzergese häm kiläçäge, cämğiätneñ radikal’läşü problemaları, İslam häm İslamçılıq, islam dinendä reformalar digän häm başqa temalarğa fiker alışqannar. Ğomumän, älege çaranıñ töp maqsatı bulıp xäzerge cämğiättä radikal’ islamnıñ küreneşlären kimetü, şuşı xaqta Rusiä möselman cämğiätenä möräcäğät itü, dip belderelde. Ser tügel, küplär islamğa terror çığanağı bularaq qarıylar. Mondıy qaraşlar bulmasqa tieş, Şul uq waqıtta, möselmannar arasında da radikal’ qaraşlı keşelär yuq tügel, bu da – döres närsä tügel. Älege qarşılıqlarnı barı tik açıq, urtaq söyläşülär nigezendä genä çişep bula, digän fiker äytkän Novosti mäğlümät agentlığına konferensiäne oyıştıruçılarnıñ berse bulğan ölkä xökümäteneñ isemen äytmägän ber wäkile.
İslam konferensiäsennän tış, şuşı könnärdä Sarıtaw şähärendä tağın berniçä iğtibarğa layıqlı waqiğa bulğan. 21 sentäberdä şähärdä İslam kompleksı açılğan. Anda 2100 kvadrat metr mäydanda meñ yarım keşelek mäçet, 200 urınlıq xatın-qızlar mäçete, mädräsä, Diniä näzaräte binası, kitapxanä urnaşqan. Şul uq könne töştän soñ Sarıtaw ölkäse möselmannarınıñ qorıltayı da uzğan. Sarıtawda bu könnärdä menä şundıy qızıqlı çaralar uzdı.
Gölnaz İlgizär
