Accessibility links

җомга, 2 декабрь 2016, Казан вакыты 23:03

İran Atom İdaräse Rezolüsiäsen Kire Qağa


BMOnıñ Xalıqara Atom Agentlığı şimbä kiç İran atom programmasın tuqtatırğa tieş, yuqsa mäsälä İminlek Şurası köntärtibenä quyılaçaq digän rezolüsiä qabul itte. AQŞ häm Yevropa Berlege rezolüsiäne xuplap qarşı alğanda İran anı kire qaqtı.

Tışqı eşlär ministrı Manuxer Mottaki rezolüsiä qabul itelerlek tügel, dip belderde. Ministr räsmi İRNA mäğlümat agentlığına, Tähran tınıç maqsatlarda atom energiäse citeşterüdän baş tartmayaçaq, dide. Ämma ber ük waqıtta İran üzeneñ atom programması turında söyläşülärne däwam itergä teli:

"Qanunsız ğämällärgä bez ışanbıybız, häm östämä kürsätmälärne ütärgä tieş tügel, ämma bez Atom Qoralın Cäyeldermäw Kileşüenä tuğrı bulıp qalabız. Şulay itep bez törle illär belän söyläşülärne däwam itüne yaqlıybız, häm İrannıñ üz yağına yaña däwlätlärne tartuı – tabiği xäl," dide İran ministrı.

İnde rezolüsiäneñ üzenä kilgändä, anda ägär dä İran atom programmasın tuqtatmasa, mäsäläne İminlek Şurası köntärtibenä quyu turında bara. Bu ğämäl kimendä noyaber ayına qadär başqarılmayaçaq, şul waqıtta ğına İdarä başlığı Möhammäd ElBaradei İran turında çirattağı xisabın iğlan itäçäk. 35 keşelek idaräneñ 22 äğzase rezolüsiäne xuplap tawış birde, 12 keşe – alar arasında Rusiä häm Qıtay wäkilläre, tawış birüdän totılıp qaldı, Venesuela rezolüsiägä qarşı tawış birde. İdarädäge İran wäkile Javad Vaeedi, rezolüsiäne uñışsız dip atadı:

"Quşma Ştatlar häm Britaniä mäsäläne xäzerdän ük BMOnıñ İminlek Şurasına tapşırunı teläde, ämma alar uñışqa ireşmäde. Quşma Ştatlar häm Britaniä kileşügä ber genä mömkinlek tä qaldırmadı, ämma bu uñışsız bulıp çıqtı," dide İran wäkile.

İdarä başlığı ElBaradei, rezolüsiä İranğa açıq räweştä möräcäğät itü buldı, dide:

"Xalıqara cämäğätçelek İranğa atom idaräse belän xezmättäşlek däräcäsenä rizasızlıq belderä, xalıqara cämäğätçelek üzara ışanıç buldırunıñ tübän däräcäse belän qänäğät tügel," dide ElBaradei.

Şulay uq anıñ süzlärenä qarağanda, söyläşülär häm diplomatiägä waqıt bar, çönki mäsäläneñ İminlek Şurasına tapşırılu waqıtı bilgelänmägän.

İdarädä AQŞnı wäkillek itkän Gregory Schulte, mäsälägä diplomatik çişeleş tabıluına ömetlänä:

"Bezneñ maqsatıbız – İran xalqı faydasına bulğan häm bezgä, İran atom programmasın tınıç maqsatlarda citeşterä digän ışınıç birgän diplomatik çişeleş. İran citäkçelege dä şul yulnı saylar digän ömettä qalabız," dide AQŞ wäkile.

Rezolüsiä öçen tawış birmägän Qıtay, İran häm Yevropa Berlegen söyläşülärne däwam itergä çaqırdı.

alsu qormaş
XS
SM
MD
LG