Accessibility links

Samar tatar milli oyışmaları buldıqlılar qulında


“Tuğan tel” isemle Samar ölkä tatar cämğiäte häm Samar şähäre tatar milli- mädäni möxtäriäte üzläreneñ berläşterelgän utırışında ber genä mäs'älä qaradılar: “Samar delegatsiäseneñ Qazannıñ 1000 yıllığında alğan tä'sirlär häm Bötendönya tatar kongressınıñ cıyınınnan soñ töbäktäge milli mäsälälärne çişü yulların barlaw.”

Zur çäy östäle tiräsendä uzğan söyläşüne cämğiät citäkçese, Samarakabel' kompaniäseneñ general' direktorı Änwär äfände Bul'xin alıp bardı. Samar delegatlarnıñ yartısı milli aktivistlardan torsa, ikençe yartısın eşquarlar täşkil itte. Eşquar Tälğät Xucin Cir şarınıñ küp mämläkätlärendä bulsa da Qazannı berençe märtäbä kürgän ikän, häm ul Qazannıñ Rimğa oxşağan yaqların kürsätep bik matur çığış yasadı. Anıñ artınnan söylägän eşmäkär Fäxretdin Kanyukaev ta üzeneñ “küp çit illärdä yörep qaytıp, tübändäge fikergä kildem”,- dide Kanyukaev. Qazan Yevropa şähärlärenä oxşamağan, ä Yevropa şähärläre Qazanğa oxşağan, çönki Qazan kebek 1000 yıllıq tarixı bulğan qalalar äz, dide eşmäkär.

İlgiz Kälüç äytüençä, BDB citäkçeläreneñ Qazanda cıyıluları başqalabıznıñ däräcäsen tağın da kütärde, meñyıllıqnı bizäde. Räisä Ğibadullina fikerençä, Bötendönya tatar kongressınıñ eşendä iñ tä'sirle çığışlar bulıp Tatarstan İlbaşı Mintimer Şäymiev, Tufan Miñnullin häm Fäwziä Bäyrämova çığışları tora. Ä “Tuğan tel” cämğiäte direktorı fikerençä, tatarda millätpärvarlek, vatanpärvarlek xislären torğızır öçen ber Samar töbägendä genä dä yöz Fäwziä Bäyrämova kiräk, häm ul Bäyrämovanı tatarnıñ ğorurlığı dip sanadı.

Azat Nadirov: “Qazannıñ şul bieklekkä kütärelüendä bezneñ dä tuzan börtege qädär bulsa da öleşebez bar,”- dide,- “çönki Tatarstan bäysezlek bayrağın kütärü belän Samara tatar milli xäräkäte Tatarstan säyäsäten yaqlaw yulına bastı”,- dide Azat Nadirov. Barlıq delegatlar da Qazannan bik tä qänäğät qaytqannar. “Qazannı bezneñ könnärgä xannar büläk ittelär häm tatar xannarına Kreml' eçendä häykällär bulırğa tieş”,- didelär söyläwçelär. Ä Änwär Bul'xin distälägän fikergä yomğaq yasağanday: “Böten närsä şäxeslärdän tora. Qazannıñ 1000 yıllığında bez şuña inanıp qayttıq, imperiä şartlarında da mädäniätne, telne, millätne saqlap qalıp bula. “Tuğan tel” cämğiäte direktorı şul fikerne däwam itep bolay dide: “Samar tatar milli xäräkäte başlap cibärgän radiotapşırular, “Berdämlek” häm “Azan” gäcitläre, “Yaqtılıq” mäktäbe, “Yalqınlı yäşlek” ansambleneñ kiläçäge bügen eşquarlarıbız qulında. Eşquarlar milli xäräkättän yöz çiersa, barçası da çärpälämä kiläçäk.

Millätpärvärlär utırışına ölkä administratsiä wäkile Nadejda xanım Osipova da kilgän ide. Ul tügäräkläw süzendä: “ Tatar oyışması köçle, aqıllı, töple şäxeslärne tupladı üz tiräsenä. Sezneñ belän eşlärgä bik ciñel. Tatar milli cämğiätläre - ölkä administratsiäseneñ teräge,”- dide gubernator apparatınıñ millätlär buyınça baş belgeçe Petr qızı Nadejda Osipova.

Şamil Bahautdin, Samar.

XS
SM
MD
LG