Accessibility links

шимбә, 3 декабрь 2016, Казан вакыты 03:21

Respublikanıñ iñ sälätle balaları Röstäm Bikmullin isemendäge şiğri-muzıkal festivalgä cıyıldı


Respublikanıñ iñ sälätle balaları üzläreneñ muzıkada häm şiğer uquda sälätlären kürsätü öçen şuşı könnärdä Röstäm Bikmullin isemendäge festivaldä cıyıldı.

Comğa irtän Qazan sintetik kawçuk zavodı profilaktoriy binasına ber-ber artlı “Sälät”neñ ölkän häm yäş, iske häm yaña dusları, ğomumän bu oyışma eşçänlege belän tanış keşelär belän tulı avtobuslar kilep tuqtadı. Barlıq qunaqlar häm konkursantlar ayırım bülmälärgä urnaşıp, töşke aş aşağannan soñ festivalneñ berençe turı - saylap alu başlandı. Jüri äğzalarına 100dän artıq keşedän torğan qatnaşuçılar armiäsen bıyıl da sigez nominatsiä buyınça bäyälärgä turı kilde. “İñ yaxşı avtor - başqaruçı”, “Estrada cırınıñ iñ yaxşı başqaruçısı”, “Xalıq cırınıñ iñ osta başqaruçısı”, “Bard cırın iñ yaxşı başqaruçı” “Üz äsären iñ yaxşı uquçı” kebek nominatsiälärdä yäşlär bik teläp qatnaştılar. Alarnı cırçılar Aydar Fäyzraxmanov, Rimma İbrahimova, ğalim Fayaz Xucin, kompozitor Roza Möxetdinova, şağirä Naciä Sattarova, Bikmullin festivalendä öç yıl rättän laureat isemen alğan yäş cırçı İlnaz Safiullin bäyälädelär. Kiçke konsertqa saylap alu barğan arada bez “Sälät” proyektları citäkçese Cäwdät Söläymanovtan Röstäm Bikmullin isemendäge festivalneñ tarixı belän qızıqsındıq.

“Älege Röstäm Bikmullin isemendäge festival dürtençe yıl rättän ütkärelä. Ul “Sälät”neñ dustı Röstäm Bikmullin istälegenä bağışlana. Röstäm dürt yıl elek avtomobil qazasına oçrap, wafat buldı. Häm bez anıñ istälegenä yıl sayın Röstäm Bikmullin isemendäge festival ütkärergä buldıq. Bez anıñ belän 1996 yılda oçraştıq häm şul waqıttan birle bez “Sälät”ne bergäläp üsterdek dip bula. Bu başqalarğa da ürnäk bulıp torır dip uylıybız. Ägär dä xäleñnän kilgänne waqıtında eşläsäñ, balalarğa yärdäm itsäñ sineñ dä isemeñ onıtılmas, däwamlı bulır.”

Dürt säğättän artıq barğan saylap alu turı uzğannan soñ, qatnaşuçılarğa gitarada uynaw ostalıq däresläre birelde häm şulay uq Röstäm Bikmullin ğailäse belän oçraşu ütte. Bu arada jüri äğzaları festival ciñüçelären bilgeläde häm Rimma İbrahimova üzeneñ festivaldän bik qänäğät qaluın “Azatlıq radiosı”na da äytte:

“Yäşlär öçen konkurslar bik kiräkle dip sanıym. Bikmullin festivalendä min berençe tapqır. Miña älege festivaldä yäşlärneñ törle janrlarda çığış yasawı ayıruça oşadı. Bezdä yäşlär bik talantlı häm bu talantlarnı üsterügä älege festivallär bik zur yärdäm itä.”

Kiçke aştan soñ, bäygeneñ töp öleşe, festival ciñüçeläre çığışınnan tözelgän gala-konsert başlandı. Monda uq jüri härber nominatsiä buyınça ciñüçelärne diplomnar häm qimmätle büläklär belän söyenderde. Dürtençe Bikmullin festivalneñ gran-prizına Rizidä Şirieva layıq buldı. Ul tamaşaçılarğa üze yazğan şiğeren täqdim itte. Şiğerdä Rizidä narkotik qullanunıñ böten faciğäsen açıp birä.

Konsert tämamlanğaç barlıq qunaqlar häm qatnaşuçılar diskätüktä küñel açıp, uçaq yanında gitarağa cırlap tañ qarşıladı.

Gölnaz Şäyxetdinova

бәйле язмалар

XS
SM
MD
LG