Samarda gäcitä- jurnallar küp basıla. Menä şul küplär öç törkemgä bülenä. Berençeläre: “Min gubernator säyäsäten maqtıym “,-dip küzgä bärelsä, ikençeläre-“ Min Samar türäseneñ ruporı”,- dip aqırıp tora, öçençeläre- aqça qapçığı östendä utıruçılarğa mädxiä cırlıy. Tügäräkläp şunı äytep bula, kem aşata- şunıñ cırın cırlıysıñ. “Samara” isemle qalın tösle jurnal baylar, aq söyäklär turında küp yaza, läkin dä ğomum federal' bieklektäge problemalarnı da kütärep çığarğa batırçılıq qıla. jurnalnıñ çirattağı sanında süzne Rusiä politoloğı, fälsäfi fännär doktorı, Rusiä fännär akademiäseneñ xalıqara iqtisadi häm säyäsi tikşerülär institutı baş fänni xezmätkäre Aleksandr Sipkoğa birgännär.
Jurnalistnıñ 15 sorawı da qızıq, töple häm iğtibarğa layıq. Menä qayber sorawlarğa birelgän cawaplar.
Aleksandr Sipko rus xalqınıñ töp baylığı itep pravoslav kul'turasın sanıy. Sipko fikerençä, Seberne ruslar açqannar häm Seberdän ruslar kitkängä uftana ul. Küräseñ bu oluğ ğalim, säyäsätçe zamanında Seber tatar xanlığın barlığın belmägän. Bügen rus xalqı närsäse belän ğorurlana ala?- digän sorawğa politolog cawabı tübändägeçä: “Bügen bez bernärsä dä tudırmıybız. Rus zıyalıları- ülem tüşägendä. Bügenge rus xalqında- cawapsızlıq, qabul itkän qararlarınıñ axırın uylıy belmäw, başbaştaqlıq. Ğasırlar buyı cıyılğan närsälärne- Uqrain, Krım, Odessa, Belorussiäne çığarıp ırğıttıq.” Häm däwam itep Sipko äfände bolay di: “Rus xalqınıñ iñ yomşaq cire- milli üzañ yuqlığı. Bügen olı buında da, keçesendä dä watan toyğısı yuq, vatanpärvärlek yuq. Bez ğäcäyep il. İlneñ küpçelek aqsöyäkläre üz ilennän borın çöyä. Bu iñ zur faciğäbez.” “İñ qurqınıçı şunda ki, inqilabtan soñğı açlıq yıllarına qarağanda da uramnarda millionlağan taşlandıq, yortsız- cirsez, ata- anasız suqbay balalar. Bu xalıq revolyutsiä yasıy almıy, xalıq sınğan, xalıqta ömetsezlek”,- di Sipko.
Jurnalist Svetlana Rutskayanıñ soñğı sorawı: “Bezneñ köçle yağıbız barmı?”- digängä, A.Sipko bolay dip tügäräkli äñgämäsen. “Rusiä cämğiäteneñ 10% zamança, ğalim, tärtiple adämnär. Bolar köçle şäxeslär. Berdänber oşanıç şul 10%-qa “,- di Rusiä politoloğı A.Sipko.
Şamil Bahautdin, Samar.
