Accessibility links

шимбә, 10 декабрь 2016, Казан вакыты 19:37

Xämäs İzrailgä qarşı höcümnären tuqtatu turında belderä


Yähüdlär Gaza sızığınnan kitügä qaramastan, annan İzrailgä qarşı üz höcümnären tuqtatmağan Xämäs törkeme yäkşämbedä säyäsäten üzgärtep, şul höcümnärdän waz kiçüen, elegräk Qahirädä ireşelgän atışlarnı tuqtatu kileşüenä qatuın xäbär itte. Uzğan atnada ğına Xämäs İzrailgä 40-lap raketa atqan ide, moña cawap qaytarğan İzrail xärbiläre atna azağında şuşı radikal fälästin törkemeneñ ber yuğarı citäkçesen yuq itte.

Uzğan atna azağında Gazada annan İzrail kitkännän birle iñ ayawsız çualışlar bulğan ide. İke atna buyı Xämäs Gazadan İzrailne raketa utına tottı, ä İzrail moña xärbi cawap qaytarıp tordı. Läkin yäkşämbedä Xämäs İzrail belän bu qarşılıqnı kierenkelätüdän waz kiçärgä buldı. Şuşı radikal törkemneñ citäkçese Mäxmüt äl-Zähär, Xämäs fälästin keşelären, ul üze äytkänçä, İzrail izüennän yaqlaw öçen Gazadan üz höcümnären tuqtata dip belderde:

"Bez Qahirädä ireşelgän kileşügä tuğrı bulıp qalabız, häm üzebezneñ suğışçan törkemebezne İzrail basıp aluına qarşı eşçänlegen tuqtatırğa öndibez", di fälästin radikal törkeme citäkçese Mäxmüt äl-Zähär.

Gazadağı çualışlar uzğan comğada qızıp kitte - anda ber raketa yök maşinasınnan töşep şartladı häm tağın ikeseneñ şartlawına kiterde, näticädä 20 keşe hälak buldı häm 120-se yaralandı. Xämäs monıñ öçen İzrailne ğäyepläde, häm İzrail yağına 39 raketa cibärü belän üzençä cawap qaytardı, gärçä soñraq bu qazanıñ oçraqlı ğına buluı açıqlandı.

Ä inde üzeneñ mondıy höcümnärne kiçerergä cıyınmawın kürsätergä tırışqan Ariel Şaron, İzrail premyer-ministrı, ilneñ qorallı köçlärenä qırıs cawap qaytaru ämeren birde. İzrail xärbi oçqıçı Gazağa hawa höcüme yasap, anda Xämäsneñ yuğarı citäkçelärennän berse Möxämmäd Xälilne yuq itte. Şaronnıñ ölkän kiñäşçese Ranaan Gissin:

"İzrail üzenä qarşı terror, köç qullanu ğämällärenä tüzemlek kürsätmäyäçäk. Bez xäzer inde Gazada tügel, häm uylıym ki, fälästin xakimiate dä, Xämäs wä İslam cihadı citäkçeläre dä tälinkäne, yäğni fikerläwen inde almaştırırğa tieş", di İzrail premyer-ministrınıñ kiñäşçese Ranaan Gissin.

Möxämmät Xälilne üterü fälästin radikalarında köçle näfrät uyattı, İslam cihadı törkemeneñ ütä-suğışçan qanatı - Yerusalim brigadaları citäkçese Äbü-Möxämmäd bu uñaydan...

"İzrail bügen şähid kitkän Xälilne inde dürt märtäbä üterergä telägän ide, ämma moradına ul bügen genä ireşte. Şuşı cinayäte öçen doşman äle tüliäçäk", dip kisätte.

Läkin Xämäs Gazadağı fälästinlelär arasında bar ğäyepne İzrailgä yağarğa tırışsa da, comğa könge şartlawnıñ asılda Xämäs ğäyebe belän buluı açıqlanğaç, käyeflär anda üzgärä töşte. Xätta fälästin üzidaräsendäge eçke eşlär ministrlığı da, qaza öçen Xämäs üze ğäyeple dip belderde.

Atna azağındağı xällär nigezdä radikallar belän kierenke mönäsäbätlärdä torğan fälästin idaräse faydasına bula ala. Düşämbedä andağı planlaştıru ministrı Xäsän äl-Qätip, Xämäsneñ höcümnärne tuqtatu belderüen xuplap, İzrail dä şulay uq eş itärgä tieş dip belderde.

Xäsän äl-Qätip, İzrailneñ dä fälästinlelärgä höcümnären tuqtatuğa ireşü öçen Quşma Ştatlarğa häm "dürtlek"kä kergän başqa taraflarğa möräcäğät itä.

Kärim Kamal
XS
SM
MD
LG