Accessibility links

Qazanğa qunaqlar kilä tora


Qazanğa haman qunaqlar kilä tora. 28 sentäberdä Tatarstan başqalasına Koreya respublikanıñ Rusiädäge ilçese häm anıñ belän bergä ber törkem eşquarlar kilde. Alar monda respublika citäkçelege belän oçraşaçaq, Tatarstannıñ iqtisadı belän tanışaçaq. Çärşämbedä Qazanğa sport yoldızı, Rusiä Däwlät Şurası deputatı Vladislav Tret’yak kilde. Şul uq könne ul premyer-ministr Röstäm Miñnexanov belän oçraşıp söyläşte. Oçraşuda süz Tatarstanda sport tarmağın torışı, anıñ üseşe turında süz barğan. Bu ölkädä Tatarstanda çınnan da maqtanırlıq närsä bar. Aq Bars, Nefteximik xokkey komandaları, Rubin futbolçıları, UNİKS basketbol komandası turında ğına süz barmıy monda. Tret’yakka yaña açılğan häm tözelä torğan sport obyektları turında da söylädelär, Qazandağı häm xätta Saba rayonındağı boz sarayın da kürsättelär. Läkin Vladislav Tret’yaknıñ Tatarstanğa kilüeneñ töp maqsatı respublika belän tanışu ğına tügel. Ul Rusiä Däwlät Şurasınıñ fizik kul’tura, sport häm yäşlär eşläre komitetı citäkçese bularaq, älege komitetnıñ 29 sentäberdä Qazanda uzaçaq utırışında qatnaşu. Utırışta Rusiä subyektlarında fizik kul’tura häm sport tarmağınıñ üseşe tikşereläçäk.

Çärşämbe könne Qazanda Ul’yan ölkäse möselman din ähelläre qunaqta buldı. Ölkä möftie Fatix Aliullov citäkçelegendäge 140 keşe Tatarstan Diniä näzaräte eşçänlege, Qazan belän tanışa, respublika din ähelläre belän oçraştı. Qunaqlarğa Qol Şärif mäçeten kürsättelär, İslam universitetına alıp bardılar. Ul’yan ölkäse delegatsiäse wäkillären respublika Diniä näzaräte citäkçelege dä qabul itte. Ä 27 sentäber könne Çistayda näzarätneñ plenum utırışı uzdı. Anda Diniä näzaräte räise Ğosman xäzrät İsxaqıy üzeneñ eşçänlege belän tanıştırdı, şulay uq utırışta süz 5 oktäberdä başlanaçaq Uraza turında, fitır sädaqası küläme xaqında süz bardı. Bıyıl ul 15 sumnı täşkil itäçäk. Plenumda dini uqu yortlarınıñ xäle, alarda uqıtunıñ torışı xaqında söyläşü buldı, dip söyläde Azatlıq radiosı tıñlawçılarına Tatarstan Diniä näzaräteneñ Üzäk apparat citäkçese İl’yas xäzrät Cihanşin.

Gölnaz İlgizär

XS
SM
MD
LG