Accessibility links

чәршәмбе, 7 декабрь 2016, Казан вакыты 13:47

Ukraina prezidentı yaña xökümät äğzaların iğlan itte; elekke premiernı qulğa alu qararı köçtän çığarıldı


Ukraina prezidentı Viktor Yuçenko yaña xökümätneñ berniçä äğzasın iğlan itte. Ul arada elekke premier Yulia Timoşenko Mäskäwgä barıp xärbi prokuratura wäkilläre belän oçraşqannan soñ Rusiä räsmiläre anı qulğa alu qararın köçtän çığardı.

Şuşı atnada Ukraina prezidentı Viktor Yuçenko yaña xökümätneñ ber öleşen iğlan itte. Korrupsiä cancalı häm üzara ğäyepläwlär näticäsendä taralğan äflisun inqilabı törkemenä almaşqa säyäsättän çittä torğan texnokratlar kiler dip kötelä ide.

Yaña premier Yuri Yexanurov tulı xökümätne şuşı atna axırında iğlan itergä cıyına. Älegä prezident 23 ministrnıñ 16sın atadı. Şularnıñ 12se elekke xökümättä eşlägän keşelär bulıp çıqtı. Şul isäptän, tışqı eşlär ministrı Boris Tarasyuk, saqlanu ministrı Anatoli Gritsenko, eçke eşlär ministrı Yuri Lutsenko.

Şulay da, Kievtağı Razumkov üzägendä säyäsi häm qanuni programmalar citäkçese Yuri Yakimenko, bu yaña xökümät säyäsät belän mawıqmıyça, prezident häm premier quyğan mäsälälär belän şöğellänäçäk dip sanıy:

"Bu xökümätneñ töp sifatı – ul säyäsätkä azraq qatışaçaq, näticädä eçke konfliktlar da azraq bulaçaq. Töp ayırma - cancalda qatnaşqan şäxeslär anda kermi."

Yaña xökümättä elekke premier Yulia Timoşenko, anıñ tarafdarları: elekke iqtisad ministrı Serhiy Teryoxin, elekke ğädättän-tış xällär ministrı David Zhvania bulmayaçaq. Yakimenko süzlärençä, bu xökümät nindider radikal üzgäreşlär tügel, ä bulğannı saqlaw xökümäte bulaçaq. Kiläse yılnıñ Martında ütäçäk parlament saylawları aldınnan prezidentqa totrıqlılıq häm iqtisadi üseş kiräk di ul.

Elekke premier Yulia Timoşenkoğa kilgändä, uzğan şimbä ul Mäskäwgä barıp xärbi prokuratura wäkilläre belän oçraşıp qayttı. Bu säfärdän soñ Rusiä räsmiläre anı qulğa alu qararın köçtän çığardı.

90nçı yıllarda Ukrainada gaz eşläre öçen cawaplı bulğan Timoçenko Rusiäneñ xärbi räsmilärenä rişwät birüdä ğäyeplängän ide. Säyäsät belgeçe Yuri Yakimenko süzlärençä, xäzer ul bu ğäyepläwlärdän arınırğa, Mäskäw belän uñay mönäsäbätlär urnaştırıp Ukrainanıñ Rusiä taraflı saylawçıların cälep itergä teli. Kiläse parlament saylawlarında Timoçenko Yuçenko partiäsenä qarşı bulaçağın äytep quydı. Bu köräştä aña Könçığış Ukrainanıñ xuplawı kiräk bulaçaq.

Timoşenkonıñ Mäskäw säfäre neçkälekläre bilgesez. Ämmä Kievtağı Yevropa häm Atlantik-aşa tikşerenülär üzäge başlığı Oleksiy Kolomiets süzlärençä, Timoşenkonıñ Kremlgä yaqınayuı Mäskäwneñ Kievqa basım yasaw niätenä işarä itä:

"Säfär üze yäşeren räweştä ütte. Bu Rusiä-Ukraina mönäsäbätlärenä açıqlıq, ütä-kürenmälek östämiäçäk."

Anıñ süzlärençä, Timoşenkonıñ wazifadan çitlätelgännän soñ 3 atna da ütmiçä, Mäskäwgä baruı, Kremlneñ Ukrainadağı saylaw aldı kampaniäsenä qatnaşu niäten kürsätä.

Belgeçlär fikerençä, Timoşenkonıñ Rusiä eşquarları belän yaxşı elemtäläre bar häm Rusiä kapitalı aña yärdäm itä ala.

Mäskäwdäge Säyäsi texnologiälär üzägennän Aleksei Makarkin süzlärençä, Mäskäw Ukrainanıñ mömkin qädär kübräk säyäsätçeläre belän elemtä qorırğa tırışa. 2004 yılda ber Yanukoviçqa ömetlänep Kreml kölkegä qaldı. Şuña kürä xäzer ul yomırqaların törle oyalarğa salırğa tırışa.

-Ali Gilmi
XS
SM
MD
LG