“Qazan küçtänäçe”neñ çirattağı rubrikasında qunaqta Mäskäw häm Tatarstannıñ tatar yäşläre yaratıp ölgergän täcribäle cırçı, köy yazuçı, 2004 yılda Qazannıñ iñ zur diskо-klubı “Arena”da ütkän “Köyle Non-stop – 2004” festivaleneñ iñ aldınğı, iñ şäp tatar di-djee diplomı lawreatı, “Ayuqay” törkemeneñ vokalistı häm tawış operatorı. Xäzer isä Rossiäneñ başqalasındağı “Qunaq” tatar yäşläre klubında emsi häm di-djey bulıp eşläwçe 19 yäşlek optimist yeget – Radik Yarullin. Radiknı Qazan yäşläre soñğı yıllarda “Bars Media” oyışması oyıştırğan tatar diskätükläre aşa ğına belä başlasalar, Mäskäw tatar yäşläre anı “Aq bars” tatar yäşläre üzäge, “Bingo”, “Relaks”, şulay iñ zur klublarınıñ berse bulğan “Kosmos”ta ütkän tatarça diskätüklärdän, Tübän Novgorod ölkäse Sırğaç rayonındağı Sabantuylarda 15,16 yäşlek waqıtınnan birle yaxşı belälär. Bügen ul “Azatlıq” qunağı…
- Radik, üzeñ belän qısqaça tanıştırıp kit äle?
- Min Mäskäwçe malay bulam inde. Tudım Mäskäwdä. Äniem tudı Qazanda, ätiem Nijgar tatarı Irbişça awılınnan. Mäskäwdä fortepiano buyınça köy mäktäbendä 7 yıl uqıdım. Xäzer Gnesin isemendäge Rossiä köy akademiäsendä prodyuserlıq hönären üzläşteräm, öçençe kursqa küçtem.
- Di-djey bulıp küptän şöğellänäseñme?
- Di-djeylıq belän küptän tügel inde. Ul minem xobbi da, “ipi” dä. Şulay inde, küñelgä yata bu professiä.
- “Qunaq”qa niçek kildeñ?
- “Qunaq”qa mine däştelär, şaltırattılar. Anda min äle ike yıl ğına eşlimen. Aña qädär min başqa tatar diskätüklärendä dä eşläp alğan idem.
- Emsi ul alıp baruçı bit inde äyeme. “Qunaq”ta diskätüklärne kübräk nindi teldä alıp barasıñ?
- Kübräk rus telendä. Çönki Mäskäwdä tatarça naçar belälär. Diskätükne başçalağanda “İsänmesez xörmätle qunaqlar” dip äytäm inde. Min söyli belämen, läkin açıq tügel.
Radiknıñ yıl başında “Bars Media” “Di-djey” radik isemle al'bomın çığardı. Al'bomda Radiknıñ üz cırları häm tanılğan tatar cırçılarınıñ cırlarına remikslar tuplanğan. Äñgämäbez däwam itä.
- “Bars Media”oyıması belän dä xezmättäşlekkä kilgändä ni diärseñ?
- “Bars”qa min şaltırattım Färit Taişovka. Min sezdä tatar remiskların tuplap al'bom çığaram didem. Annarı Alla boyırsa üzemneñ cırlardan torğan cıyentıygıymnı çığaram. Dekaber aylarına dip isäpläp toram.
- Salawat Fätxetdinov, Xäniä Färxi kebek cırçılarnıñ cırlarına biyü remiksları tudıru ideyäseneñ sere nidä?
- İdeyä, belmim qayda çıqqandır, möğayın diskätüktäder. Çönki miña qabatlanmas tatar biyü köyläre kiräk ide. Berençe tapqır Salawatnıñ “Awılım qayınnarı” na yasadım. Bu köy xalıqqa oşadı häm şunnan soñ inde Xäniyä Färxi, Güzäl Urazova häm başqa cırçılarğa da eşli başladım. Şularnı tuplap al'bom çığardım.
- Menä sin Mäskäwdä dä Qazanda da diskätüklärdä yäşlärne bietäseñ. Mäskäw tatar yäşläre belän Qazannıqılar arasında ayırma barmı?
- Bar, ayırma bar. Min uylıym bezneñ Mäskäwdäge tatarlar berdämräk häm köçle ruxlı, bergäläşep biep-cırlap küñel açalar. Sezdä bit tatar diskätüklärenä tatarlar belän ruslar da yörilär. “Qunaq”ta ruslar bik az, anda kübräk nijgar tatarları küñel aça.
- Ä sin üzeñ qaysısına keräseñ?
- Min üzem 50гә 50ле inde. Äti nijgar, äni Qazan…
- Sin bit äle cırlar da yazasıñ. “Tatar radiosı”nda cırlana torğan…
- “Siña aşqına küñel”!!!
- Äye, äye. Bu cırnıñ tarixı belän qısqaça tanıştırmassıñmı?
- Anı min yazdım qışın. Bu cırnıñ avtorı Rişat Ramazanov. Ul anı minem apağa yazğan ide. Kilde bezneñ öygä, söyläde şuşı şiğerne häm min şunduq süzlären eläkterep alıp cır yazarğa buldım.
Röstäm İsxaqi.
