Accessibility links

дүшәмбе, 5 декабрь 2016, Казан вакыты 11:45

Yekaterinburda Qazan qunaqları bulıp kitte


Küptän tügel Yekaterinburg şähärendä Tatarstannıñ Uraldağı daimi wäkile Rawil Bikbov Qazan milli-mädäni üzäge virtual' muzey baş möxärrire Räsim Mähdiovnı häm tatar ornamentı ostası, rässam Zöfär Nizametdinne qabul itte. Qunaqlarnıñ rässamnıñ tuğan yağı – Serov şähärendä bulıp qaytıp kileşläre ikän. Çirattağı yalların qızıqlı da, faydalı da itep uzdırğannar alar.

Räsim äfände Mähdiev rässam dustınıñ eşläre belän bik ğorurlanıp söyläde. Anıñ äytüençä, Zöfär Nizametdin tatar xalqınıñ küñel bizäklären original räweştä, üzenä genä xas itep kürä häm xalıqqa citkerä belä. Bolğar xanlığı çorınnan uq kilgän tarixi, borınğı bizäklärne bik döres häm qabatlanmas itep çağıldıra rässam. Qazannıñ oluğ yubileena bağışlap eşlängän eşläre ayıruça zur iğtibarğa layıq. Küptän tügel anı Qazannıñ meñyıllığı medale belän büläklägännär.

Zöfär äfände üze törki-tatar tarixı turında bik qızıqlı fikerlär äytte. Anıñ fikerençä, Tın okeannan başlap Dnepr yılğasına qädär elek törki xalıqları yäşägän. Rässam küzlegennän çığıp qarağanda, xäzerge Rusiä xalıqları mädäniäte bizäkläre nigezenä näq menä törki xalıqlar milli bizäge salınğanı kürenä, di ul.

Böten Rusiä xalıqlarınıñ mädäni mirasın täşkil itä torğan törki xalıqlarınıñ ornamentların öyränü üze ber fän dip sanıy Zöfär Nizametdin. Ul fänne öyränü häm üsterü öçen ayırım ber milli räsem sänğäte mäktäbe açası ide dip xıyallana ul. Ul mäktäpne açu öçen iñ qulay urın itep Ural ciren kürä. Anıñ äytüençä, asıltaşlı Ural töbäge tabiğäte belän dä, eşçän keşeläre belän dä, alğa kitkän sänäğäte belän dä monıñ öçen uñay şartlar tudıra ala.

Oçraşu waqıtında Ural cirendä Zöfär Nizametdinneñ soñğı eşlärennän torğan kürgäzmä oyıştıru turında süz alıp barıldı. Monnan tış, Qazan qunaqları muzeylarda bulıp, küp kenä närsälärne öyränep, qarap, bik faydalı söyläşülär alıp barğannar. Räsim Mähdiev bu cirlärdä elek-elektän törki xalıqlar yäşägänlegen isbat itkän qimmätle eksponatlarnı Qazanğa alıp kitep, andağı muzeyda kürgäzmägä quyu mömkinçelege turında söyläşülär alıp barılğanlığı turında söyläde.Şulay itep, Qazan belän Yekaterinburg arasında tarixi bäyläneş däwam itä.

XS
SM
MD
LG