Accessibility links

Кайнар хәбәр

Tömändä “Duslıq küpere” festivale ütte


Menä 11 nçe tapqır inde “Duslıq küpere” törle millät wäkillären ber urınğa cıya. Här yılnıñ közendä Tömän şähärendä “Duslıq küpere” isemle festival' uza. Cır, biü, sänğät ostaları, kürkäm ğöref-ğadätlär, milli rizıqlar bäygesendä qatnaşuçılarnıñ sanı yıldan-yıl arta bara. Bu xaqta festival'ne açqan waqıtta Tömän ölkäse gubernatorı urınbasarı Sergey Sarıçev ta äytep uzdı. Anıñ süzlärençä, bıyılğı festival'gä 1000 gä yaqın keşe kilgän. Xantı-Mansi okrugı, Çiläbe ölkäse, Tön'yak Qazaqstan wäkilläre dä bar.

«Duslıq küpere” neñ berençesennän ük bu bäygedä tatarlarnıñ üzeşçän sänğät ostalar da qatnaşa. Milli işek aldı itep yasalğan urında çatırlar qorıla, qazan asıla, aş-su peşä. Muzey kürgäzmäläre ütkän tarix turında söyli. Milli mädäniätlär yortı yanında uzğan festival'dä bu yortnıñ tatar bülege citäkçese Cämilä Räximova: “Yärkäw, Tömän, Tobol, Yalutr yaqlarınnan üzeşçän sänğät ostaları, barlığı 135 keşe kilde”,- dide.

Tömän şähäreneñ “Duslıq” xalıq cır ansamble bäygedä qatnaşqannarnı da, mäğlümat çığanaqları wäkilläreneñ dä iğtibarın cälep itä. Berençedän, alar küp- 30 dan artıq. İkençedän, milli kiemnäre salqınça bolıtlı könne açıp cibärgändäy itä. Bayançı Äsmabikä Mirxäydärova äytüençä, bıyılğı festival alar öçen bişençese. “Äpipä” ne äzerlägännär

Änä tatarlarnıñ işek aldındağı ber poçmaqta uçaq östendä qazan qaynıy, ber qırıyda apalar taban balığın çistarta. Seber tatarları taban balığın bik üzençälekle itep çistarta. Üten genä alıp ata. Ä eçendäge sabası qala.

Törle niğmätlär tezelgän östälneñ xucabikäse bügen Yärkäw rayonı tatarlarınıñ milli mädäni avtonomiäse başlığı Gölnisa Fäxretdinova. Bıyılğı festival'gä alar 20 törle rizıq äzerlägännär.

“Duslıq küpere”nä Tobol şähäreneñ milli muzee bik üzençälekle eksponatlar alıp kilgän. Muzey citäkçese Rawilä Kutumova monnan 100 yıl elek töşerelgän fotoräsem belän tanıştıra. Bu fotoğa qarap alar milli kiemnär tekkännär. Ä törle qurçaqlar yasaw ostası Roza Äminova milli kiemdäge qurçaqlar täqdim itä. “Bäyäse 200 sum. Tormış säwdä itergä etärä”,- di ul.

Änä tege poçmaqta çuaş qızları taw xalıqlarınıñ bubenğa suğıp biegänenä isläre kitkän. Milli kiem kigän qazaq apaları polyaklarnıñ tarixi kürgäzmäläre belän tanışa. Ä ber yeget, anıñ östendä slavyan xalıqları kieme, qulına “Duslıq” ansambleneñ bayanın alğan da “Äpipä”ne cırlap utıra.

Dmitriy Çugunovnı Tobol şähärendä uqığan waqıtta Yärkäw rayonında tuıp üskän Ayzat Näsibullin tatar köylärenä öyrätkän. Bügenge festival'dä Dmitriy beloruslar törkemendä. “Sin üzeñ qaysı millät wäkile”,- dip sorağaç,- “Minem öçen iñ berençe çiratta millät tügel, ä aqıllı keşe bulırğa tieş”, di ul.

“Duslıq küpere” festivale ike kön däwam itte. Bu ike kön eçendä şatlıq, küñel açular belän bergä bäygelärdä ciñü öçen borçılular da küp buldı. Bıyılğı bäygedä tatarlarğa 4 nçe urınnı birdelär, ä berençelekne çuaşlar aldı.

Nail Alan. Tömän.

XS
SM
MD
LG