Qazanda Duma deputatları törkemeneñ oçraşular uzdıruı turında söylägän idek. Tanılğan xokkeyçı häm Rusiä Dumasınıñ fizkul’tura, yäşlär eşläre komitetı başlığı Vladislav Tretyak ikençe tanılğan sportçı Röstäm Miñnexanov belän oçraştı. Sabadağı sport mäktäplären qarap qayttı. Vladislav Tretyaknıñ häm başqa Duma deputatlarnıñ Qazanğa kilü maqsatı, Fizkul’tura turındağı federal qanunnıñ qullanu täcribäse belän tanışu ide. Şuşı temağa bağışlanğan cıyılış, Däwlät Şurasında buldı.
Däwlät duması komitetınıñ küçmä utırışın, Vladislav Tretyak «İsänmesez xörmätle, iptäşlär» dip tatarça sälämläw belän başlap cibärde. Min Vladimir Putinnan oyränäm, ikençe kilügä yaxşıraq häm kübräk itep tatarça soylärmen, dide. Vladislav Tretyaktan qala, tatarça söyläşüçe başqa keşe bulmadı anda.
Tretyak, Dumanıñ häm xakimiätlärneñ sportnı üsterü öçen niqädär eş eşlänüen söyläde. Ul, Rusiä byüdjetnınıñ 1%-da sportnı üsterü öçen totılmıy, dip söyläsä dä, ikänçe yaqtan, 3 milliard sum salınğan maqsatçan programmanıñ äzerlänep kilüen äytte. Şuşı programmada mäsälän, 90 million sum fizkul’turanı propagandalawğa totılaçaq, dide ul. Tağın federal häm cirle byudjet aqçalarına zamança stadionnarnı tözü quz aldında totıla dide Vladislav Tretyak. Ul üzeneñ çığışında, Rusiä Prezidentınıñ çığışlarına işaräläp söyläde. Vladimir Putin fizkul’turanı üsterü kiräklege turında federal cıyınğa yasağan yullamasında äytkän bulğan, ul härdaim mondıy proyektlarğa teläktäşlek kürsätä ikän. Vladislav Tretyaknıñ Qazanğa kilüneñ tağın ber maqsatı bar. Anıñ citäkçelegendäge häm elekke sportçılar cıyılğan Duma komitetı deputatları, fizkul’tura häm sport turındağı federal qanunğa üzgäreşlär kertergä cıyına. Elleke qanun 1999 yılda qabul itelgän häm ul kertkän tärtiplär, bügenge köngä turı kilmi, dielde cıyılışta. Älegä qanunğa tözätmälärne Tatarstannıñ yäşlär, turizm häm sport ministrlığı da kertergä tora. Mäsälän, ministr Marat Bariev çığış yasap, trenerlarnıñ statusın kütärü turındağı qanun kiräk dide, sportçılarnı tärbiäläwçe keşelärneñ eş xaqların kütärü, az aqçağa sport mäktäplärendä ber kemneñ dä eşlärgä telämäw kebek mäsälälärne atap kitte. Dumanıñ fizkul’tura häm sport komitetında räise urınbasarı Tatarstannan saylanğan deputat İldar Ğilmetdinovnıñ buluın iskä alsaq, respublika ministrlığınıñ täqdimnäre iğtibarsız qalmawın farazlarğa bula.
Duma deputatları, federal qanunğa sport oyışmalarına yomşağraq salımnar quyarğa, digän täqdim belän çıqqan ikän. Anı da Tatarstan deputatları xuplap çıqtı.
Bu xaqta, utırışta çığış yasağan, Tatarstan däwlät şurası räise urınbasarı Aleksandr Gusev ta äytte. Ä, Tatarstannıñ üz çurtanda, milliardlar salınğan maqsatçan programmalarında qatnaşu şanları bar.
Bikä Timerova.
