Accessibility links

шимбә, 10 декабрь 2016, Казан вакыты 17:56

Semberdä “Djamaat” östennän mäxkämä bara


Bu törkem turında süz, ber qızıp alıp-ber tınıp, 3 yılğa yaqın däwam itä inde. 2003-yılnıñ cäyendä GAİ xezmätkäre citäkçelegendäge bandanıñ tönge yullarda maşinalarnı talawı, şoferlarnı üterüe turında cirle matbuğat bik nıq şawlağan ide. Dikäberdä, näq çekistlar könendä, alarnı totqaç, bandanıñ iseme “Djamaat” bulğanlığı açıqlandı. Anda cirle urıs, tatar, muqşı, çuaşlardan tış, Kavkaz keşeläre dä buluı bäyän itelde. Banditlarnı İslam dine belän bäyläwneñ berdän-ber cebe – fatirlarında “vaxxabit yunäleşle kitaplar” tabıluı bulğanğa, Ölkäneñ eçke eşlär idäräse süzçese Svetlana Muravikovadan şul kitaplarnıñ isemnären sorarğa turı kilde. “Vaxxabizmnıñ närsä ikänen beläse kilä, dip, tıynaq qına itep. Läkin kitaplarnıñ isemnäre dä “tikşerü sere” bulıp çıqtı, äytmäde.

Ä matbuğat konferensiälärendä, televizor aşa, internetta Sember vaxxabitların faş itülär yañğırday yawdı. Yıl buyı barğan tikşerülär waqıtında tağın 22 yäş yeget qulğa alındı. Näq ber yıl uzğaç, yänä dä çekistlar könendä, Prokuraturanıñ süzçese Vasiliy Zima tikşerü eşe tämamlanğanın, qulğa alınğan 30 keşeneñ 22се irekkä çığarılğanın, eşneñ sudqa tapşırılğanın belderde. Mäğlümlät çaraları tağın ber märtäbä İslam dine turında awız çayqap aldılar da tındılar.

Yartı yıl çaması uzğaç, “Tuğan tel” oyışması ölkä prokurorı Malışevqa açıqlıq kertüne sorap xat yazğan ide. Banditlardan kem häm nindi “vaxxabitlı” anıq ğamällärdä ğayıplänä? Tikşerü waqıtında 22 yäş yegetne qulğa alıp cäberläwlär häm soñnan barısında azat itü nindi maqsatlardan eşlände?

Prokuraturanıñ Ayıruça möhim eşlärne tikşerü bülege başlığı, yustitsiä sovetniğı Vinogradov qul quyğan xatta bolay ğına dielgän: “Abdulkarimov A. U., İlmendeev V. G. Häm başqalarnı berniçä cinayättä, şul isäptän Cinayätlär mäcmuğasınıñ 282 matdäseneñ 2-kisägendä qaralğan cinayät buyınça da eş, qarar qılu öçen, Ul'yan ölkä sudına yunältelde. Şuña kürä Sezne qızıqsındırğan mäğlümlät alu öçen, sudqa möräcäğät itärgä kiräk”.

“Tuğan tel” aktivistları sudqa möräcäğät itep qaradılar. Eşne qaraw başlanğaç, mäğlümlät birerbez, digännär ide. Qarıy başladılar. Ämma yabıq işeklär artında.

Şul arada töp räsmi basma “Narodnaya gazeta” soñğı sanınıñ 1-bitendä at başıday xäreflär belän “Vaxxabitı gotovilis' k teraktam” dip oran saldı. Ällä nindi xäşärät töstä baştan ayaqqa qädär qorallanğan saqallı banditlar surätlärennän fotomontaj huşıñnı alırlıq.

Sud başlandı ğına. Yabıq sud. Ä räsmi gazeta banditlarnı İslam dinenä törep, üz xökemen çığardı da inde.

Ayrat İbrahim, Sember.

XS
SM
MD
LG