Accessibility links

шимбә, 3 декабрь 2016, Казан вакыты 01:32

Törkiä TVse Qazan turında film kürsätte


Törek televidenieseneñ dönya illärenä küsätelgän xalıqara programası TRT-Int’te 29 Sintäberdä kiçke säğat sigezdä “1000-nçe yılında Qazan” isemle yartı säğatlek dokumental film kürsätte. Ul ikençe köngädä qabatlandı. Programanı Nur İdil Büyükciväläk äzerlägän. Soñgı yıllarda senarie häm süräte yağınnan da bu xätle yuğarı sıyfatlı tapşıru bulmağan ide disäk yalğışmabız. Şiksez tamaşaçılar, Qazanıñ maturlığın kürep şaq qatqannardır. Çönki bu tapşıruda Tatarlarnıñ ütkäne dä, 1000 yıllıq Qazannnıñ bügene dä bik profetsional räweştä çağıldırıldı. Gel tatar muzıkası yañğırağan programa “Qazan ber töş, başqaça äytkändä ber äkiät şähäre; İdel belän Qazansu arasında tözelgän Qazan ber muzeyğa oxşıy” digän süzlär belän başlanıp kitte. Söyläwçe “Tarixkä, mädänniätkä, sänğatkä, dinnär belän xalıqara duslıqqa iä bulğan bu miras menä bu şähärdä urnaşqan. Şähär törek häm slav mädäniätlären ber berenä yaqınlaştıru rolen başqara. Qazanıñ iñ borınğa xucaları Bolğarlar” digännän soñ Bolğar häm Bilär xäräbäläre ekranda kürende. Biredä Prof. Fayaz Hucinneñ bu çor tarixı turında Tatarça äytkän süzläre yañıradı. Tatarstandağı televideniedä Tatarça işetü bik qıyınlaşqan ber waqıtta, Fayaz äfändeñ çatırdatıp Tatarça äytkän süzlären Törek tamaşaçıları turıdan-turı işetep, añlamağannarın ekrandağı Törekçä tärcemäsennän uqıp, xarabälärne qarap tordılar. Artınnan ekranğa Prof. Gamircan Däwlätşinneñ Altınurda turında şulay uq Tatarça birgän mäğlümätläre yanğıradı. TRT Int’täge programada şunnan soñ Qazan Xanlığı tarixı, kürkäm Qol Şärif mäçete küreneşe astında äytelgän süzlär belän tapşırıldı. Tabiği Kreml belän Söyembikä dä iskä alındı. Qol Ğali xäykäle aldında isä Prof. Hatip Minnegulov ta tıñlawçılarğa şağirneñ Tatar xalqı öçen ähämiyäten tatarça añlatıp birde. Qol Ğalidän soñ Tatar mädäniäteneñ modern çorınıñ ataqlı wäkile kompozitor Salix Säydäş kürsätelde. Qazanda 20dän artıq mäçet, cirkäw häm sinagoglar buluwı turında da äytelde.

Törek televideniese 29 Augusta ütkärelgän Dönya Tatarları Koñresına da iğtibar itkän. Şuşı uñaydan Prof. Nadir Däwlät belän ütkärelgän ber qısqa intervyü dä tapşırıldı. Kongresqa Taşkenttan qatnaşqan Sariya Narbayevanıñ da Tatarça söyläwe qızıqlı küreneş ide. Parlament çitäkçese Färit Möxämmätşin TRT aşa Tatarça itep Töreklärgä sälämnären, izge teläklären tapşırdı. 1996 yılda açılğan Törkiä konsullığınıñ, xäzer inde ilenä kire qaytqan iske başkonsılı, İsmail Hakkı Musanıñ Tatarstan häm tirä yağında 10 meñ xätle Törek watandaşı buluwı turında birgän mäğlümättennän soñ, Ramsdor mödire Cemil Akkaya üzenä premier-minister tarafınnan iñ yaxşı citäkçe digän diplom birelgän buluwı turında äytkän süzläre qızıqlı berär mäğlümät buldılar. Tatarstan suverinetının 15-nçe yılı uñayı belän 30 Augusta birelgän konserttan qayber küreneşlär dä kürsätelde. Tapşıru Tuqaynıñ matur ber şiğere häm Qazannıñ yıraqtan töşerelgän ber manzara belän tämamlandı. Qısqası yartı säğat eçendä Tatarlarnı häm 1000-nçe yılnı şundıy täesirle, kürkäm häm sıyfatlı kürsätkän öçen Törek televideniesenä häm programanı äzerlägän Nur İdel Büyükcivelekkä räxmät äytäse genä qala.

4 Uktäberdä isä Ankarada Tatarstan premierı urınbasarı häm Mädäniät ministrı Zilä Wällieva belän Törek kollegası Koç tarafınnan 1000 yıl fotoräsem kürgäzmäse açılaçaq.

Äxtäm İbrahim, İstanbul

XS
SM
MD
LG