Accessibility links

шимбә, 3 декабрь 2016, Казан вакыты 09:51

Räşit Äxmätov: xakimiät öçen köräşneñ masştabları tañ qaldıra


Tatarstanda cirle üzidarälärgä uzaçaq saylawlarğa äzerlek bara. Älege saylawlar ütäçäk kön – 16 oktäber yaqınlaşqan sayın köräş tä köçäyä bara. Döres, tıştan bu köräşneñ niçek barğanı ällä ni kürenmi, sizelmi. Saylawçılar iğtibarına qızu bäxäslär dä, tartqalaşu, pıçraq texnologiälär yärdämendä ber nämzätneñ ikençesenä yalğan yağu oçraqları da täqdim itelmi. Ğadi xalıq, ğomumän, älege saylawlar turında bik az belä, alar belän ällä ni qızıqsınmıy.

Läkin xakimiätkä omtıluçılar öçen bu saylawlar şaqtıy xälitkeç çara. Bigräk tä Qazan Şurasına saylanuçılar öçen. Ör-yaña, tözekländerelgän şähärneñ Ratuşa binasında 16 oktäberdän soñ 50 deputat başqala yäşäyeşeneñ iñ aktual’ mäsällären xäl itep utıraçaq. Qazan Şurasına saylanırğa şähär merı Kamil İsxaqov ta teläk belderde. Şuşı nisbättän ul yal alıp, eşennän dä kitte. Xäyer, İsxaqovnıñ saylaw aldı agitatsiäse dä ällä ni işetelmi. Şulay da, qayber mäğlümätlärgä qarağanda, kelämastı köräşe şaqtıy qızu bara.

Bu xaqta älege dä bayağı Zvezda Povolj’ya gäcitendä anıñ baş möxärrire Räşit Äxmätov yaza. Gäcitneñ çirattağı sanındağı üzeneñ atna sayın basıla torğan säyäsi añlatmalarında ul bu yulı näq menä şuşı xaqta uylana. Yalğa kitkän Kamil İsxaqov kürenmi dä, işetelmi dä, mernıñ üze terkälgän Wahapov saylaw okrugında ciñüe bäxässez. Läkin ul aldan uq saqlanu çaraların kürep quyarğa teli küräseñ. Kemnän qurqa soñ Kamil äfände, dip sorıy Räşit Äxmätov. Häm üze ük älege sorawğa, bügenge köndä İsxaqov barı tik Mintimer Şäymievtan genä qurqa ala, dip cawap ta birä. Ğomumän, Tatarstan prezidentı Qazan merın üzeneñ opponentı, dip sanıy ul. Üzeneñ şaqtıy qızıqlı häm üzençälekle fikerläre belän bilgele jurnalist fikerençä, Mintimer Şäymiev Vladislav Surkov lagerındağı keşe. Kamil İsxaqov isä, çekistlar – Seçin, İvanov törkemenä yaqınraq. Rusiä prezidentı Vladimir Putin isä Tatarstan citäkçesen bilgelägändä älege wazifada Şäymievnı qulayraq körde. Gärçä, Qazan merı da bu urınğa bik ömetlänep torsa da.

Alay ğına da tügel, Vladimir Putin Mintimer Şäymievnı Qazannıñ meñyıllığın bäyräm itkän könnärdä bik zurladı, dip sanıy, Räşit Äxmätov. Başqa gubernatorlar aldında anı ürnäk itep quyu diseñme, Rusiä şaw-gör kilep Kulikovo qırındağı ciñüne bilgeläp ütkändä, Rusiä prezidentınıñ älege çaralarda qatnaşmawı da Şäymiev sorawı buyınça eşlängän. Ğomumän, Şäymiev Putinğa kiräk. Kiläçäktä Tatarstan citäkçese Putinnıñ almaşçısında premyer yäki vitse-prezident wazifasına da ömetlänä ala, digän fikerdä tora Zvezda Povolj’ya gäcite baş möxärrire. Läkin Kamil İsxaqov ta tik utırmıy. Ul xalıqara eşçänlegen dä cäyelderä, Rusiä külämendä dä şaqtıy gubernatorlar arasında berençelärdän bulıp sanala. Bu aña, älbättä, şaqtıy qıybatqa töşä. Läkin xakimiätkä omtılğanda totılğan aqçanı sanap torış yuq inde ul.

Menä şulay itep, berençe qaraşqa tınıç häm tawış-tınsız ğına bara torğan saylaw aldı kampaniäse, zur aqçalar, serle söyläşülär, tege yäki bu taraflarnıñ tä’sir köçe belän bäyle bulıp çığa. Ä menä bu bik qatlawlı häm awır protsesslar ni belän tämamlanaçağın, alarda kemnär ciñäçägen bezgä älege xätta täcribäle Räşit Äxmätov tä äytä almıy. Monı barı tik waqıt qına kürsätäçäk.

Gölnaz İlgizär

XS
SM
MD
LG