Qazan xalqı nihayät zur säxnädän berençe tapqır tatarça al'ternativ muzıka işette. Finlyandiädän Dänis Bädretdin, Avstraliädän Zölfiä Kamalova, Qırımnan Änwär İzmaylov häm Qazannan Aydar Fäyzraxmanovnıñ fol'klor ansamble 3 säğät tiräse fonogrammasız töre tawışqa cırladılar. Bilgele tatar popsasına iäläşkän qayber Qazan tamaşaçısı öçen alarnıñ muzıkası şaqtıy säyer toyıldı. Bigräk tä äbilär öçen. Şuña berençe tänäfestän soñ zallarnı tutırıp utırğan äbilärdän urınnar buşabraq qaldı. Konsertta Qamal teatrı şığrım tulı ide. Biletlar tiz arada satılıp betü säbäple yäşlärneñ kübese kerü biletlarına da riza bulıp satıp alğannar.
Berençe bülektä Dänis Bädretdin üzeneñ “Qazan gruppası Bädretdin” törkeme belän çığış yasadı. Ul Zarifä, Tatarstan poyezdı kebek tanılğan cırların başqardı.
Şunnan Zölfiä Kamalova üz muzıkantları belän çıqtı. Ul üz çığışı barışında tamaşaçılarnı zalda tübätäydä utırğan ätise belän tanıştırdı. Anıñ Ägerce rayonınıñ Urazay awılınnan buluın äytte. Aña bağışlap cır başqardı. Şulay uq tatar muzıkası turında üz xislären belderde.
Min qaywaqıt telne añlamasam da cırnı yörägem belän sizäm häm anı oşatıp başqaram.
İkençe bülekne Qırımnan virtuoz-gitaraçı Änwär İzmaylov açıp cibärde. Ul kübräk qırım-tatar köylären başqardı. Gitarada çiertep uynap törle milli uyın qoralları tawışın çığardı
Ğomumän konsertta qırım-tatar muzıkasına basım yasaldı. Dänis Bädretdin da, Zölfiä Kamalova da üz çığışlarında qırım-tatar cırlarına tuqtaldılar.
Änwär İzmaylov çığışı qısalarında, anıñ qızı Liliä İzmaylova da qırım tatar cırın başqardı.
İñ azaqta Aydar Fäyzraxmanovnıñ fol'klor ansamble çığış yasadı. Älege ansambl' Qazan tamaşaçısına inde küptän tanış. Şul säbäpleme yäşlärneñ kübese inde Änwär İzmaylov çığışınnan soñ konsertta qalunı kiräk tapmadı.
Canlı tatar muzıkası festivaleneñ kiläse konsertı Mäskäwdä, annan Qırımda uzaçaq. Konsert aldınnan ber kön alda matbuğat oçraşuında älege 4 artist üzen ber yodrıq bulıp tuplanuı turında äyttelär. Ämma ber yodrıqqa biş barmaq kerüe mäğlüm. Älegä bişençe barmaq tabılmağan ikän. Häm Dänis tä, Zölfiä dä tatarda alarnıñ başlanğıçın däwam itterüçelär bulır dip ışanuın belderdelär.
Landış Xarrasova.
