Londonda urnaşqan Amnesty İnternational keşe xoquqları oyışması Yevropa Berlege citäkçelären, kiläse atnada Rusiä prezidentı Vladimir Putin belän oçraşqanda, aña keşe xoquqları mäsäläsendä basım yasarğa çaqırdı. Oyışma xisabında Rusiä xärbi köçläre Çeçnya häm İnguşetiädä keşe xoquqların bozunı däwam itä, töbäktä keşelärne urlaw, qulğa alu häm cäberläwgä Rusiä räsmiläreneñ qatnaşı bar, dielä. Britaniä premyer-ministrı Tony Blair sişämbe könne Londonda Yevropa Berlege-Rusiä sammitın cıya.
