Accessibility links

чәршәмбе, 7 декабрь 2016, Казан вакыты 19:28

Ğäläm yaña turistik urınğa äylänä - "Soyuz" korabı inde öçençe säfärine alıp kitte


Şimbä irtän Qazağstandağı Baykonurdan kükkä Rusiäneñ "Soyuz" ğäläm korabı kütärelde. Rusiäneñ genä tügel, çit il mäğlümat çaralarınıñ da bu säfärgä zur iğtibar birüe bu korabta urıs häm amerikan astronaftları - Valeri Tokarev häm William McArthur bulu belän genä añlatılmıy. Anda äle tağın ber keşe, Gregory Olsen bar häm ul ğälämgä üzenä kürä yal säfäre belän bara.

Olsen tarixtağı öçençe ğäläm turistı. Şuşı ğäyre ğädäti säyäxätkä äzerlängändä ul 900 säğättän artıq törle künegülär ütärgä tieş buldı. Tağın ber möhim sannı kiterergä kiräk - ğälämgä barıp qaytu teläge Gregory Olsengä, qayber xäbärlärgä qarağanda, 20 million dollarğa töşkän. Anıñ qarawı ul xäzer bar dönyada andıy bäxet tätegän öç kenä keşeneñ berse bulıp tora.

60 yäşen tutırğan häm inde onıqları bulğan Olsen ğälämnän Cirneñ güzälleklären küzätü belän çiklänergä telämi, anda ul keşe gäwdäseneñ awırlıq yuğalu şartlarına reaksiäsen tikşergän sınawlar ütkärergä cıyına. Comğa könne korabqa kütäreler aldınnan Gregory Olsen üzeneñ beraz tınıçsızlanuın, ämma barıber ğömerendäge berdänber säfärne bik kötep aluın belderde:

"Korab bik yaxşı xäldä, bez anı kiçä qarap çıqtıq. Barıbız da yulğa äzer, ekipaj da, min dä äzer", digän ide comğa könne ğäläm turistı Olsen.

Ul ğälämdä 10 kön ütkäräçäk, ä menä anı ozatıp barğan astronaftlarnı ozınraq säfär kötä. William McArthur häm Valeri Tokarev Xalıqara Ğäläm stansiäsendä 6 ay ütkärergä cıyına. "Soyuz" isä ğäläm stansiäsenä düşämbedä tağılır dip kötelä. Anda xäzer eşlägän urıs Sergey Krikalev häm amerikan John Phillips kire Cirgä Gregory Olsen belän qaytaçaq. Alar anda bıyılğı aprildän birle ide. Krikalev belän Phillipsneñ soñğı burıçı - öçençe ğäläm turistın isän-imin kire Çirgä alıp qaytu.

Kärim Kamal
XS
SM
MD
LG