Kiev. Ukrainanıñ yaña premyer-ministrı Yuri Yexanurov şimbä könne üze citäklägän xökümätneñ berençe utırışın ütkärde häm anda xökümätneñ säyäsätkä bik qatnaşmayaçağın, ämma üz eşen açıq itep alıp baraçağın belderde. Mäğlümat çaralarına xökümät eşe turında daimi xäbär itelep toraçaq dide ul. Utırış barışında Yexanurov üzeneñ comğa könne Mäskäwgä barıp qaytuınnan qänäğät qaluın äytte. Ul, Ukraina häm Rusiä räsmi şäxesläreneñ soñğı aralaşuı şuşı ike ilneñ prezidentlarına, ikeyaqlı mönäsäbätlärdäge kirtälärne beterep, urtaq eşçänlekneñ töp yünäleşlären bilgelärgä yardäm itte dip belderde.
