Accessibility links

дүшәмбе, 5 декабрь 2016, Казан вакыты 05:31

Başqortstan jurnalistlarınıñ Ş. Xodaybirdin premiäsee iäläre mäğlüm


Başqortstanda, başqa yıllardağı kebek ük, bıyıl da jurnalistlar arasında Şahit Xodaybirdin isemendäge däwlät büläkläre öçen bäyge oyıştırılğan ide. Älege icadi bäygene oyıştıru komissiäsenä yazğı aylarda uq cämğısı 13 jurnalistnıñ eşläre saylap alındı. Alar arasında gazetalar häm jurnallar redaksiäläre xezmätkärläre dä, radio häm televidenie jurnalistları bar.



Menä comğa könne şuşı abruylı icat yarışmasında ciñüçelärneñ isemnäre mäğlüm buldı häm matbuğatta bäyän itelde. Däräcäle büläkkä däğwä itkän 13 keşedän dürtese ciñep çıqqan älege bäygedä. Başqortstan däwlät radiosı xäbärçese Räsül Sägıytov, başqort telendä çığuçı “Başqortstan” gäzite jurnalistı Älfiä Aqbutina, “Yäşlek” gäzite tarafınnan täqdim itelgän jurnalist Azamat Yuldaşbaev, , şulay uq “Kiçke Ufa” gäziteneñ urıs telendäge basması xäbärçese Tamara Nefedovalar şuşı büläkkä layıq dip tabıldı. Däğwäçılarnı saylap alu yäşeren tawış birü yulı belän ütkärelde.

Başqortstan Xökümäte qarşındağı Matbuğat, näşriätlär häm poligrafiä buyınça idärä başlığı Boris Melkoedov, bäygeneñ ciñüçeläre bäyän itelgäç yasağan çığışında älege yarışmada kübräk Ufadağı jurnalistlarnıñ qatnaşuın, ä rayonnarda yäşäp eşläwçe jurnalistlarnıñ az buluın bilgeläp ütte. Bu inde bälki töbäklärdäge jurnalistlarnıñ talantsız buluınnan tügel, ä alarnı şuşı bäygegä täqdim itüneñ naçar quyıluınnan toradır.

Şahit Xodaybirdin isemendäge premiägä bıyıl layıq buluçılarnı qotlaw, alarğa şuşı büläkneñ bilgelären tapşıru tantanası 5 oktäber könne, ğädättägeçä, Ş. Xodaybirdinnıñ tuğan yağı Kügärçen rayonında ütäçäk.

Fänis Fätxi, Ufa.

XS
SM
MD
LG