Accessibility links

якшәмбе, 4 декабрь 2016, Казан вакыты 19:26

Samarda terelätä keşe yandırdılar


“Komsomol'skaya pravda” Samarda isemle gäcitä üzeneñ 150-nçe sanında teträtkeç xäbär bastırdı. Äkräm Äxmätcanovnı häm anıñ iptäşen 34 yäşlek Oleg häm 18 yäşlek Sergey terelätä yandırdılar. Gäcitä bu turıda täfsilläp bolay dip yaza.

Metallurglar stadionı yanında yäşäwçelärne irtänge säğät 4-tä can özgeç aqıru uyattı, Äkräm Äxmätcanov terelätä yana ide. Ä qara eş bolay başlanğan. Kiçen 34 yäşlek Oleg häm 18 yäşlek Sergey iptäşläre belän, küñel açu yözennän, salıp utırırğa niät qılğannar. Tön urtasında ber iptäşläre qaytıp kitä, ä Oleg belän Sergey küñel açuların däwam itälär. Kinät alarnıñ küzenä yänäşädä genä eskämiädä söyläşep utıruçı ike könçığış çıraylı irlärneñ utıruları küzlärenä taşlana. Şunda Sergey alarğa: “Sez, çurkılar, nigä monda yörisez!”- dip baqıra. Cawap kötep tormıyça Sergey belän Oleg bu ike möselman bändäsen ütergänçä qıynıylar. Ul ğına citmi, Sergey üze saqlıy torğan avtostoyankağa kerep xäräkätsez sıqrap yatuçı ike irneñ östenä kraska sibä dä ut törtä. Aşığıç yärdäm kilep citkäç ut öyermäsennän qotılğan ir üzeneñ Äkräm Äxmätcanov ikänlegen äyterlek añı bula, ä ikençese inde añsız qalğan bula.

Bu qotoçqıç faciğä Samarda oçraqlımı? Yuq! Moña cirlek inde 910 yıllap äzerlänä. Samar diwarlarındağı “Rossiä- ruslar öçen” digän yazmalar yıllar buyına sörtelmi häm bu yazmalar zamanında “Alğa, kommunizmğa!” sıman tabiği küreneşkä äylände. Mäktäplärdä barlıq uquçılarğa da çirkäw yasarğa quşıp, tatar malayı mäsced suräte yasağan öçen ikele quyu- bolar barçası da şovinizmnıñ faşizm bieklegenä üsep citär öçen yomşaq cirlek.

Min “Tuğan tel” cämğiäte ideologı Azat äfände Nadirovqa şaltıratıp monı bäyäläwen soradım. Ul telefonnan miña tübändäge fikerne äytte:

“ Rus xalqı däwlätneñ töp milläte bularaq xakimiätkä çınnan da açulı. Faşizmnı ciñgän xalıq bügen ciñelüçelärdän naçarraq yäşi. Elekkege soyuzdaş respublikalardan da ruslar küpläp qayttı, şunıñ östenä rus matbuğatınıñ ber öleşe daimi ruslarnıñ naçar yäşäwen kilmeşäklär arqasında dip tuğlap kilä. Samarnıñ “Voljskaya zarya”, “Ya- russkiy v Samare” gäcitäläre millätlärgä qarşı bik qatı, usal yazalar,”- dide “Tuğan tel” äğzası Nadirov äfände.

“Ya- russkiy v Samare” isemle gäcitäneñ här sanında qaysıdır millät wäkile urısnı ütersä, marcanı köçläsä gäcitä täfsilläp yaza.

Rusiä yazuçılar berläşmäseneñ äğzası şağir Gennadi Syun'kov gäcitäneñ soñğı sanında “Vektor” isemle şiğeren bastırğan. Şunnan dürt yulın ğına uqıp kürsätü dä gäcitäneñ qiblasın kürsätä dip uylım.

Ax, çto ce eto za zaraza,

S vsego banditskogo Kavkaza

Polzet k nam, slovno sarança?

İ terrorizm za neyu sledom

Letit na qajdıy naş porog.

Ax, nindi bu zaraza

Banditlı Kavkazdan

Bezgä sarançaday ağıla.

Ä şular artınnan bezneñ

Här busağağa terrorizm oçıp kilä.

Äle berniçä yıl el elek kenä ärmän bulğan öçen genä ber yegetne ütergännär ide Samarda. Kavkaz yegeten ütergännär, aziälelärne cäberlägännär digän xäbärlär yıraqta sıman ide, ä üz millätneñ wäkilenä qul suzğaç bäla- cäberneñ ayaq astında ikänenä kübräk inanasıñ.

Samar cirlegendä tomşığın kürsätüçe yäş faşizm öçen kiçä genä Kavkazdan kilgän dä, 400 yıl buyına bergä kön kürgän tatar da ber. Samar rus faşizmınıñ küzlege tik zäñgär küzle, sarı çäçlelärne genä tanıy.

Şamil Bahautdin, Samar.

XS
SM
MD
LG