Accessibility links

җомга, 9 декабрь 2016, Казан вакыты 03:06

Sember ölkäsendä soñğı atnada baytaq milli-mädäni çaralar oyıştırıldı


Tatar mädäni üzäge äbi-babaylarıbıznı Ölkännär köne uñayınnan cıydı. Qunaqlar aş-su belän genä tügel – Rinat Sadıykov häm Alsu Tuktarova büläk itkän cır-moñ belän dä sıylandılar. Çarada şulay uq yäş buınnı tärbiäläw, mäktäp sistemasınıñ soñğı qortqıçlıq ğälämätläre turında da citdi süzlär yañğıradı.

Cirle avtonomiäneñ dikäbergä bilgelängän isäp-xisap qorıltayına äzerlek yözennän, ölkä üzägeneñ Timeryul rayonı avtonomiäse tözelde. “Tuğan tel” aktivistları rayon başlığınıñ sotsial' mäs'älälär buyınça urınbasarına Prigorodnıy mäktäbe direktorı Semilenovnıñ tatar telenä, mädäniätenä qarata tiskäre mönäsäbäten üzgärtü çaraların kürüne sorap möräcäğät ittelär. Şulay uq rayonda yäşäwçe tatar balaları öçen ayırım çırşı bäyräme uzdıruda, Timeryulçılar klubında tatar sänğäte tügäräge açuda yärdäm soradılar. Rayon avtonoiäse şurası räise bulıp Äsgat' Galävetdinovnı saylandı.

İske Qulatqı rayonı Urta Tereşka awılında yäşäwçe elekke partorg, xäzerge mulla Qamil xäzrät Xämzinnıñ “Awılım serläre” isemle kitabın xalıqqa täqdim itü çarası buldı. Anda rayon häm ölkä başlıqları Möxärräm Salixov häm Sergey Morozov ta qatnaştılar.

Dimitrovgrad dip ataluçı Mäläkäs şähärendä Qaharmannar alleyası açıldı. Anda İske Mayna rayonı İske Qızılsu awılında tuıp üskän, suğıştan soñ şuşı şähärdä yäşägän , Dan ordenınıñ tulı kavalerı Abdulla Bildanov byustı da quyılğan.

Şul uq Mäläkäs şähäreneñ “Vosxod” isemle Mädäniät sarayında tanılğan cırçı Raziä Bildanovanıñ konsertı uzdı. Kiçädä Gölnara Safiullina citäkçelegendäge “Jasmin” isemle ğäräp biyue ansamble dä qatnaştı.

Ölkä üzägeneñ iñ zur zalı – Lenin memorial' üzägendä “Cide yoldız” konsertı zur uñış belän uzdı. Döres, iğlannarğa ışanıp, Alsu Xisamieva, Räsim Nizamovlarnı tıñlarğa kilgän tamaşaçı, alarnıñ kilmäwenä rizasızlıq beldersä dä, tulayım alğanda, qänäğät taraldı. Çönki Sember tamaşaçısınıñ elektän yaratqan cırçısı Rezeda Töxvätullinanıñ buluı beraz tınıçlandırdı anı.

XS
SM
MD
LG