Accessibility links

сишәмбе, 6 декабрь 2016, Казан вакыты 05:59

Tikşerüçelär Bali şartlatuların başqaruçılarnıñ kemlegen açıqlarğa tırışa


Indoneziäneñ Bali utrawında tikşerüçelär şimbä könne 26 keşeneñ ülemenä, 130-lap keşeneñ yaralanuına kitergän şartlatularnı başqarğan 3 intixarçınıñ kem buluın açıqlarğa tırışai. Politsiä äytüençä, başqaruçılarnı açıqlaw şartlawlarnı kem oyıştırğanlığın belergä yardäm itäçäk. Älegä beräw dä cawaplılıqnı üz östenä almadı. Ämma küp kenä terrorğa qarşı köräş belgeçläre bu şartlawlar Jemaah İslamia suğışçan törkeme ısulında buldı dip belderä häm yaña höcümnär bulırğa mömkin dip kisätä.

Şartlatuçılarnıñ berse Kuta yal şähärendä yar buyındağı restoranda şartlaw bulır aldınnan oçraqlı räweştä beräw töşergän videoga eläkkän dip isäplänelä. Australiäle ber turist restoran aldındağı östlällär artında utıruçılarnı töşergän bulğan. Şul videoyazmada restoranğa qara kiemdäge ryukzaklı ber keşeneñ kerüe töşerelgän. Ul keşe kerü belän 10 sekundtan şartaw tawışı iteşelä.

Küp tä ütmästän 8 çaqrım yıraqlıqta Jimbaran şähäreneñ yar buyındağı 2 restoranında da şartlaw bula. Şul şartlawlarnıñ bersendä yaralanğan yapon keşese "Zur şartlaw tawışınnan başqa berni xäterlämim. Şunnan soñ böten yaqta xaos buldı. Häm şunnan soñ minem qarşıdağı keşeneñ ber dä qimıldıy almawın xäterlim" dide

Politsiä şartlawlar urınınnan bik yamsez ämma kireqaqqısız dälillär, gäwdäsez 3 baş häm 3 par ayaq qına tabuın belder. Bu qaldıqlar 3 intixarçınıñ kem buluın açıqlarğa yardäm itär dilär. Tikşerüçelär bu başlarnıñ sürätlären inde kiñ cämäğätçelekkä kürsätep belüçelär bulsa alarnıñ kem buluın tiz arada xäbär itüne soradı.

Bali Politsiäse başlığı Made Pastika alarnıñ kem buluın açıqlaw şartlawlarnıñ oyıştıruçıların tabarğa yardäm itär ide di. "3 itnixarçınıñ berse Kutada, 2-se Jimbaranda bulğan. Şigem yuq, oyıştıruda häm şartlatqıçlarnı äzerläwdä başqalar da qatnaşqan, häm bez alarnı ezlibez" dide Pastika.

Tikşerüçelär bigräk tä bu şartlawlarnıñ Jemaah İslamia suğışçan törkeme belän bäyläneşe bulu-bulmawına dälillär ezli. Jemaah İslamia äl-Qaidä terror çeltäre belän bäyläneştä buluın beldergän ide. Jemaah İslamia soñğı yıllarda Balida bulğan berniçä şartlaw, şul isäptän 2002-neñ üktäberendä 202 keşene ütergän şartlaw öçen dä cawaplılıqnı üz östenä aldı.

Tikşerüçelär şimbä şartlawları elekke Jemaah İslamia şartlawların xäterlätä di. Ämma İndoneziä xoquq oyışmaların belän bergä eşläwçe Awstraliä politsiäse äytüençä, Kutada häm Jimbaranda qullanılğan şartlatqıçlar elekke Jemaah İslamia şartlatularındağıdan şaqtıy ayırıla.



İndoneziä prezidentı Susilo Bambañ Yudhoyono terrorçılar yaña höcümnär äzerlärgä mömkin dip kisätte häm ildä uyawlıqnı arttırırğa wäğdä itte. "Bez ildä terrorçılıqqa qarşı köräşne köçäytäçäkbez. Bez saqlanu, buldırmaw terrorğa qarşı köräşü öçen çaralarnıñ tieşençä buluın bäyäläw eşen däwam itäçäkbez. Bez terrorğa qarşı köräştä näticäle dönyaküläm, töbäk häm cirle xezmättäşlekneñ ber öleşe bularaq İndoneziädä terrorğa qarşı däwamlı köräşäçäkbez" dide prezident.

İldäge barlıq politsiä köçläreneñ öçtän ikese kiräk bulğan operatsiägä kereşü öçen iñ yuğarı däräcädä äzer tora.

Terrorçılar höcüme küpçelek xalqın möselmannar täşkil itkän İndoneziäneñ Hindular yäşägän öleşendäge turism sänäğätenä dä bik zur orım bula ala. İndoneziäneñ Bali utrawı turizm sänäğätenä 2002-nçe yılğı şartlawlar näticäsendäge qatı orımnan soñ äle genä ayaqqa basıp kilä ide.

Naif Aqmal, Praga.
XS
SM
MD
LG