Accessibility links

Qazanlılar qışqa äzerlänä


İnde oktäber başlanıp kitügä dä qaramastan, Tatarstanda cılı häm qırı hawa torışı xökem sörä. Xätta ağaçlar da üzläreneñ yafraqların salırğa aşıqmıy. Xalıq yalların tabiğättä, baqçalarda ütkärä. Üz baqçaları bulmağannarı isä, Qazan bazarlarında uza torğan yäşelçä yärminkälärendä qışqa kişer, bäräñge, käbestä satıp, äzerläp qalırğa tırışa. Här şimbä, yäkşämbe könnärendä respublikanıñ törle rayonnarınnan kilgän xucalıqlar qazanlılarğa üzläre üstergän yäşelçälärne täqdim itä. Bu yallarda uzğan yärminkälärdä Tatarstannıñ awıl xucalığı ministrı Marat Äxmätov tä buldı. Döres, ul qapçıq-qapçıq bäräñge yäki kişer alırğa kilmägän ide monda. Ministr bazarlardağı satunıñ barışı, bäyälär belän qızıqsınıp yörde. Häm kürgäne belän qänäğät qaluı xaqında belderde. Şulay itep, awıl xucalığı xezmätkärläre bu aralarda şähär xalqın şatlandıra. Ä alarnıñ üzlären 7 oktäber könne täbrikläyäçäklär. Barısın da tügel, älbättä, ä iñ layıqlıların ğına. Bu könne Qazanda 5 meñ awıl xucalığı aldınğıların xörmätläyäçäklär, dip xäbär itä Tatar-inform agentlığı. Şähär bazarlarında ütä torğan yärminkälär bar qazanlılar öçen bik qulay bulsa da, ayıruça alar, ä döresräge, anda satıla torğan tawarlarğa bäyälär belän olı keşelär qänäğät. Çönki anda bäyälär şaqtıy arzan. Ä bäyräm – Olılar köne uñayınnan bu alar öçen bigräk tä möhim. Xäyer, monnan tış ta pensioner häm veterannar öçen Olılar könenä bağışlanğan unkönlek qısalarında şaqtıy ğına çaralar qaralğan.

1 oktäberdän respublikada xärbi xezmätkä közge çaqırılış başlandı. Bu yulı Rusiä armiäsenä 4 meñ tatarstanlı alınırğa tieş. Läkin çınbarlıqta alarnıñ küpmese xezmätkä kitäçäge bilgele tügel. Çönki Rusiä armiäsenä barırğa teläwçelär sanı haman da artmıy. Respublikanıñ xärbi komissariatı wäkilläre Tatarstannan xezmätkä alınğan yäşlär qaynar noqtalarğa cibärelmäyäçäk, dip beldersä dä. Bu yallarda Qazanda bilbawlı köräş buyınça dönya çempionatı ütte. Älege sport bäyrämendä 40tan artıq ildän 181 köräşçe qatnaştı. Şunısı qızıq, yarışlarda irlär genä tügel, ä xatın-qızlar da qatnaştı. Bäygedä köräşkän 12 tatarstanlıdan 10 medal’ yawlap ala aldı. Çempionatnıñ absolyut batırı bulıp ta Çallı yegete Ayrat Ğilaev qaldı. Komandalar arasında berençelekne Rusiä komandası aldı, ikençe urında – ayırım çığış yasağan tatarstanlılar, öçençedä isä – Üzbäkstan wäkilläre. Yarışta qatnaşuçılarnı köräşçe, Olimpiä uyınnarı ciñüçe Aleksandr Karelin da kilgän ide. Sportçılarnıñ köräşüen qarawdan tış, ul äle respublika premyer-ministrı Röstäm Miñnexanov belän dä oçraşıp ölgerde. Aleksandr Karelin şuşı könnärdä genä respublikada qunaqta bulıp kitkän sport yoldızlarınıñ çirattağısı ide.

Gölnaz İlgizär

XS
SM
MD
LG