Accessibility links

дүшәмбе, 5 декабрь 2016, Казан вакыты 13:40

Yewropa Berlege Üzbäkstanğa çikläwlär kertä, läkin Taşkentnıñ moña ällä ni ise kitmi


Yewropa Berlege tışqı eşlär ministrlarınıñ Luxembourgtağı oçraşuında Törkiädän tış äle ikençe ber möhim mäs''älä dä qarala häm ul başqa ber törki däwlätkä - Üzbäkstanğa qarıy. Uzğan atna azağında Yewropa wäkilläre, ministrlar düşämbedä Taşkentqa qarşı qayber çikläwlär kertüen iğlan itäçäk dip beldergän ide.

Yewropa Berlege, Amerika Quşma Ştatları kebek ük, Üzbäkstan xakimiateneñ Ändicandağı qanlı waqiğälärne bäysez xalıqara komissiä tarafınnan tikşerügä qarşı buluına qänäğätsezlek belderä. Yewropa Berlege küz aldında totqan çaralar arasında Üzbäkstanğa qoral satunı tuqtatu, däwlät citäkçelärenä Yewropağa vizalar birmäw, yardämne qısqartu kebeklär bar. Moñardan tış, Berlek belän Üzbäkstan arasında eşläp kilgän Partnerlıq wä Xezmättäşlek kileşüeneñ qayber öleşlären tuqtatıp toru da qaralğan. Ämma küzätüçelär şuşı çikläw çaralarınıñ, alar berençe qaraşqa şaqtıy qurqınıç yañğırasa da, asılda Taşkentqa ällä ni zur yoğıntı yasamayaçaq dip isäpli. Misal öçen, yardäm külämen kimetü belän yanawğa kilgändä - 2006-nçe yılda Üzbäkstan Yewropa Berlegennän 11 million 250 meñ eurolıq yardäm alası bulsa, şuşı san xäzer 2 millionğa ğına kimetelä. Qoral satu çikläwe dä Taşkent öçen qurqınıç tügel, ul anı barıber Yewropa Berlege illärennän almıy diärlek. Anıñ bu ölkädäge töp partnerı Rusiä, saqlanu ministrı Sergey İvanov yözendä, inde uzğan comğada uq, Yewropanıñ Üzbäkstanğa qoral çikläwe kertüe Mäskäwneñ Taşkent belän bulğan xärbi xezmättäşlegenä bernindi dä yoğıntı yasamayaçaq, bez şuşı dustanä il belän mönäsäbätlärne kiläçäktä dä täräqqi itäçäkbez dip belderde. Üzbäkstan citäkçeläre öçen berdänber yaman närsä bulıp alarğa Yewropağa säyäxät itüne tıyu ğına qala. Prezident Aleksandr Lukaşenka xakim itkän Belarus şundıy çikläw belän inde şaqtıy waqıt yäşi häm Lukaşenka üz säfärlären xäzer kübräk Mäskäwgä yasıy.

Kärim Kamal
XS
SM
MD
LG