Tatarstannıñ möselman xatın-qızları berlege häm anıñ citäkçese, Möslimä gäciteneñ baş möxärrire Älmira xanım İdiätullina tatarstanlılarğa yaxşı tanış. Azatlıq radiosı tıñlawçıları da alarnıñ eşçänlege turında daimi işetep tora. Çönki möselman xatın-qızları oyışması bik aktiv eşli, alar yış qına törle möräcäğät, açıq xatlar, taläplär belän çığalar. Sişämbe könne Älmirä xanım radiobıznıñ Qazan byurosına şaltıratıp, üzläreneñ çirattağı yañalığı belän bezneñ tıñlawçılarıbıznı da tanıştırunı ütende. Bu yulı respublikanıñ möselman xatın-qızların Amerikada bulğan köçle zilzilä-dawıllar bitaraf qaldıra almağan. Älmirä İdiätullina fikerençä, Quşma ştatlarğa tınıçlıq häm iminlek kilsen öçen älege ilgä üz xärbilären Ğiraqtan çığarıp, andağı suğışnı tämamlarğa kiräk. Prezident George Bush yullanğan möräcäğättä süz näq menä şuşı xaqta bara. Älmira xanımnıñ bu turıda fikerläre.
Quşma ştatlarında bulğan su basular, dawıllar şul qädärle küñelgä xäwef saldı, bu minutlarda älege xäwef-xätärlär Amerikağa Allahı täğäläneñ cäzası, digän fikerlär kilä başladı. Amerikadağı şuşı awır xällär waqıtında ul äytte, Allağa yalwarığız, ğafu ütenegez, dide. İslam dinen totuçılar bularaq bu bezgä bik yaqın toyıldı. Oyışmabızda şuşı xaqta fikerläşep, söyläşep, Amerika prezidentı George Bushqa möräcäğät yullarğa buldıq. Anda bez tiz arada Ğiraqtağı suğışnı tämamlap, qan qoyunı, keşe üterüne tuqtatunı taläp itäbezŞulay uq, Älmirä xanım bezgä Qazanda açılğan yaña ber mäçet turında da xäbär itte. Ramazan ayı aldınnan şähärneñ Qadış bistäsendä Fatixa digän yaña mäçet eşli başlağan.
Gölnaz İlgizär
