Accessibility links

Кайнар хәбәр

Uqıtuçılar bäyrämendä dä mäğärif problemaları onıtılmıy


Rusiädä 5 oktäberdä – Xalıqara uqıtuçılar könen bilgeläp üttelär. Tatarstan da ğädättägeçä älege bäyrämne iğtibarsız qaldırmadı. Şuşı uñaydan Qazannıñ Piramida küñel açu üzägendä respublikanıñ mäğärif xezmätkärläre cıyılıp, bäyräm itte. Respublikanıñ Fän häm mäğärif ministrlığı üzeneñ zur çaraların xäzer yış qına Piramida üzägendä ütkärä. Bıyılğı avgust kiñäşmäseneñ plenar utırışı da şunda uzdı, Uqıtuçılar könenä dä mäğärif xezmätkärlären qotlarğa näq menä Piramidada cıyıldılar. Ällä mäğärif ministrlığın Fän häm mäğärif ministrlığı dip üzgärtü däräcäsen kütärde bu tarmaqnıñ, ällä yaña ministr säbäpçe buldı, belmässeñ. Niçek kenä bulmasın, mäğärif ölkäsenä xäzer respublikada iğtibar arta töşte. Mäktäplär, balalar baqçaları da küp tözelä, awıllardağı keçkenä mäktäplärne dä sirägräk yabalar.

Uqıtuçılar köne belän qotlarğa bäyrämgä respublikanıñ Däwlät Şurası räise Färit Möxämmätşin kilgän ide. Ul üze häm Tatarstan prezidentı Mintimer Şäymiev isemennän respublikanıñ mäğärif tarmağında eşläwçelärne qotladı, ğädättägeçä alarnıñ cawaplı, tınğısız eşläre öçen olı räxmätlären belderde, kiläçäk eşlärendä uñışlar, tormışlarında bäxet teläde. Annarı süzne Fän häm mäğärif ministrı Räis Şäyxleslamovqa birdelär. Şulay uq çarada başqa ministrlıq wäkilläre dä respublika uqıtuçıların häm barlıq Piramidağa cıyıluçılarnı bäyräm belän qotladılar, yaxşı teläklär telädelär. Qızğanıçqa qarşı, qotlawçılarnıñ, çığış yasawçılarnıñ tawışın sezgä işetterä almıybız, çönki alar barısı da rus telendä genä söyläde, gärçä barısı da diärlek Tatarstannıñ küp millätle, törle dinle xalıq yäşägän respublika, dip äytep kitsä dä. Şulay uq Piramidada uzğan bäyräm çarasında mäğärif ölkäsendä zur uñışlar qazanuçılarğa büläklär tapşırdılar, alarnı täbrikläp cırladılar, biedelär. 2004 yıl öçen Qayum Nasıyri premiäsen tapşıru da buldı monda. Respublika ministrlığı buldırğan älege büläkkä bu yulı Tatar gumanitar institut rektorı Wasil Ğäyfullin, Yäşel Üzännän tatar tele uqıtuçısı Vil Şäriazdanov, Sabadağı Ällüki balalar baqçası citäkçese Älfiä Möxärlämova häm Qazannıñ 18 tatar gimnaziäse kollektivı layıq dip bilgelängän ikän.

Cırlar, biülär, qotlawlar belän bäyräm şulay itep ğädättägeçä matur ütte. Läkin bäyräm bäyräm belän, ä mäğärif tarmağında çişelmägän problemalar da az tügel. Rusiädä bara torğan älege ölkädäge reformalar da xälne yaxşı yaqqa bik üzgärtmi kebek. Bu xaqta bez Qazannıñ 2 gimnaziäsendä tärbiä eşläre buyınça direktor urınbasarı wazifasın başqaruçı Nailä Ğälieva belän söyläşäbez. Ul bezgä mäğärif ölkäsendäge problemalar turında äytte.

Berençe problema – xezmät xaqı inde älbättä. Uqıtuçınıñ ul stavkadan tora. 18 säğät uqıtasıñ ikän, 2500 sum tiräse aqça alasıñ. Şuña da uqıtuçılar, 25-30 säğät alıp eşlärgä mäcbür. Uqıtu sıyfatınıñ bu oçraqta nindi bulğanın üzegez çamalıysızdır inde. Ägär dä uqıtuçı şuşı tieşle 18 säğät öçen citärlek aqça alıp eşläsä, berkem dä 30-şar däres uqıtmas ide, dip uylıym, pedagogik uqu yortlarına da mäktäpneñ iñ aldınğı uquçıları barır ide, cämğiättä uqıtuçınıñ abruyı da zurraq bulır ide

Nailä Ğälieva täcribäle uqıtuçı, ul inde 20 yıldan artıq uqıtuçı bulıp eşli. Şuña da, mäktäp aldında tora torğan xäzerge problemalarnı çişü yulları xaqında anıñ üz fikerläre bar.

Mäğärif tarmağındağı problemalarnı çişü dä berençe çiratta şul aqça mä’säläsenä qaytıp qala. İkençedän, xökümät uqıtuçığa, mäktäpkä yöz belän borılırğa tieş. Material’-texnik bazanı kütärü, iske mäktäplärne tözekländerü, yañalarnı buldıru, pedinstitutlarda uquçılarğa stipendiälärne kütärü, alarnı mäktäptä qaldırunı tä’min itü – bolar barısı da bügen eşlänergä tieşle eşlär. Çönki mäğärif ölkäsendä, minemçä, xällär şaqtıy ayanıç

Menä şundıy fikerlär belän büleşte bezneñ belän Uqıtuçılar könendä Qazannıñ 2 gimnaziäsendä tärbiä eşläre buyınça direktor urınbasarı Nailä Ğälieva. Ä bäyrämgä kilgändä isä, ul bu könne ällä nindi zur çaralar oyıştırunı kiräk dip sanamıy, aña balalar qotlawı da citä. Şulay yaxşığa ömetlänep, azğa ğına dä qänäğät bulıp yäşi häm eşli bügenge uqıtuçı.

Gölnaz İlgizär

XS
SM
MD
LG