Berniçä yıl elek Tatarstannıñ tellär turındağı qanunına üzgäreşlär kertelep, ike däwlät telen belüçe uqıtuçı häm tärbiäçelärgä östämä 15% xezmät xaqı tülänä başladı. Bu könnärdä Qazanda ike telle belgeçlärne östämä aqçalardan mäxrüm itü turında süzlär yöri. Bu xäbär ber tel- urıs telen genä belgän uqıtuçılarnı nıq söyenderde. Azatlıq xäbärçeläre uzdırğan soraştırular şunı kürsätä. Bälki, ozaq yıllar däwamında barğan ber telle uqıtuçılarnı diskriminasiäläü şunıñ belän tämamlanır da, dip söylilär alar. Ber tel genä belgän uqıtuçılarnı çittä qaldırıp, ike däwlät telendä belgännärgä östämä xezmät xaqı tüläwne yuristlar xezmät kodeksına nigezlänep näq diskriminatsiä dip atıylar dip yaza, ber Qazan gäzite.
Berniçä yıl elek deputatlar tellär turındağı qanunğa üzgäreşlär kertte. Älege dokumentlar eşläw däwerendä respublikadağı ike telle uqıtuçılarnı aqça belän tä'min itü kiñ qolaç cäymäde. Ä menä Qazanda älege programma nigezendä östämä aqçalar uqıtuçılarğa ğına tügel, xätta ike telle kitapxanäçelärgä, avtobus yörtüçelärgä dä birelä başladı. Federal' qağidä buyınça östämä 15% xezmät xaqı rus sıynıflarında tatar telen häm kiresençä, tatarlarda rus telen uqıtuçılarğa ğına tülänergä tieş. Qazanda isä tatar sıynıflarında däreslärne tatarça alıp baruçı uqıtuçılarğa, balalar baqçalarında ike däwlät telendä söyläşüçe tärbiäçelärgä dä östämä aqçalar tülänä. Äytik, Qazanda tatar häm rus törkemnäre bertigez bulğan qayber baqçalarda tärbiäçelärneñ ber yartısına östämä aqça tülänsä, ikençelärenä yuq.
“Вечерняя Казань” gäzite şul uñaydan şapırınıp-şapırınıp şatlana. İmeş “iketellelärneñ” östämälären alaçaqlar ikän. Bu xäbär niqädär döreslekkä turı kilä? Qazan şähäre mäğärif idäräse başlığı urınbasarı Marat Lotfullin açıqlıq kertä.
“Qazan şähärendä tatar telendä eşläwçe uqıtuçılarğa 15% östämä tüläw däwam itäçäk. Älbättä yaña zakon nigezendä ul tüläwlärneñ şartları ministrlar kabinetı tarafınnan bilgelänergä tieş. Bez ul täqdim belän Ministrlar kabinetına çıqtıq. Häm ministrlar kabinetı moña qarşı çıqmas dip uylıybız. Häm bu tüläwlär däwam itäçäk. Kamil' Şamil ulı üzeneñ mäğärif belgeçläre cıyılışında Qazannıñ “Ömet” fondı saqlanaçaq dip äytte. Älbättä, nindider normativları
Marat Lotfullin iskä alıp ütkän “Ömet” fondı, näq menä ike tel belgän mäğärif xezmätkärlärenä aqça tüläw belän, monnan tış, şähärdä tellärne üsterü mäs’äläläre belän şöğellänä.
Şulay itep, Qazan xakimiäte çinovnikları, ber tel belgän uqıtuçığa qarağanda, ike däwlät telen dä belgän mäğärif xezmätkärlärenä 15 protsent östämä aqça tüläwne qaldıraçaqlar dip ışandıra. Waqıtında, bu östämä tüläw urıs telen genä belgän belgeçlärne ikençe däwlät tele sanalğan tatar telen dä öyränügä qızıqsındıru çarası bularaq ta kertelgän ide. Läkin, soñı aralarda, respublikada, bigräk tä Qazan kebek zur şähärlärdä tatar telenä iğtibar citep betmäw nıq sizelä. Anı kimendä binalarnıñ eläm taqtalarına ğına qarap ta kürep bula.
Gölnaz Şäyxetdinova
