Accessibility links

якшәмбе, 4 декабрь 2016, Казан вакыты 15:22

Ğiraqta 8 Britan xärbieneñ üleme öçen Britaniä İrannı ğäyepli


Bu ğäyepläwne bügen Londonda premier-ministr Tony Blair qabatldı. Britan räsmiläre fikerençä, İran Ğiraqnıñ könyäğında xäräkät itkän şiği törkemnärne qoral belän täemin itä, ber ük waqıtta sönnilär belän dä xezmättäşlek itä. Räsmi Tähran bu ğäyepläwlärneñ barısın da kire qağa.

Ğiraqnıñ könyağında xäräkät itkän ğisyançılar infra-qızıl nur yärdämendä tözälä torğan, qorıçnı ütep kerä alırday zamança şartlatqıç qullana. 8 Britan xärbie näq menä şundıy qoraldan häläk bulğan. Mondıy qoral könyaq Livanda xäräkät itkän Hizbollah törkemendä bar. Ä bu törkem İrannıñ İslam İnqilabı gvardiäse belän tığız elemtädä tora. Britan räsmiläre Ğiraqtağı "İran ezen" menä şulay añlata.

İrannıñ tışqı eşlär ministrlığı wäkile Xämit Reza-Asefi bu ğäyepläwlärne çep-çi yalğan dip atadı. Atnakiç Londonda Ğiraq prezidentı Calal Talabani belän oçraşqannan soñ, Britan premierı Tony Blair bu ğäyepläwlärne yänä qabatladı, gärçä bu yulı İrannıñ xökümäten telgä almadı:

"Şul mäglüm: Ğiraqta yaña şartlatqıç qullanıla, Britan xärbilärenä genä qarşı tügel. Bu qoralnıñ ezläre İranğa, yä İran tarafınnan xuplanğan Hizbollağa barıp totaşa. Älegä bu tögäl tügel."

Bu xäbärne berençe itep taratqan, iseme äytelmägän ber Britan räsmie äytüençä, Britaniäneñ Bağdadtağı ilçese İran ilçesen bu xaqta berniçä tapqır kisätkän bulğan. Yağni, diplomatik köräş inde küptän bara. Ni öçen räsmi London mäsäläne xäzer kiñ cämäğätçelekkä çığarırğa buldı soñ? Londondağı Strategik tikşerenülär institutında xärbi belgeç Charles Langton fikerençä:

"İke närsägä iğtibar itergä kiräk. Berençedän, Ğiraqta referendum aldınnan ğisyan köçäyä. İkençedän İrannıñ atom programması tiräsendä kierenkelek arta. Britaniä İran belän söyläşülär alıp barğan 3 Yewropa ileneñ berse."

Şuşı fikerdän çığıp, İran Britan xärbilärenä höcüm arqılı Londonğa basım yasarğa teli digän näticä yasap bula. Bu fikerne Londondağı Ğäräp-İran üzäge belgeçe Riza Nurizade dä alğa sörä:

"İranlılar Britannarğa şunı kürsätergä teli: alar alarğa qarşı tora, xärbilären üterä, zıyan kiterä ala. Şunıñ belän İran Londonnıñ atom programması mäsäläsenä qaraşın üzgärtergä tırışa."

Riza Nurizade süzlärençä, Ğiraqta, bigräktä könyağında İran ezläre baytaq. Şiğilärneñ Badr brigadasında İranda, şul isäptän bu ilneñ Eçke eşlär ministrlığında äzerlek ütkän yözlägän suğışçı bar. Andıy keşelär xättä Ğiraq politsiäsendä bar, di ul.

Britannar isä İrannıñ Ğiraqtağı "tırışlıqların" başqaça - kolaitsiä köçlärenä kübräk zıyan kiterü niäte belän añlata. Şiğilär genä tügel, sönnilärgä dä yärdäm itü şunnan kilä di alar.

Niçek kenä bulmasın, İrannıñ atom programması turında söyläşülär körçekkä terälgännän soñ Britaniäneñ bu ilgä basımı arta bara. Näq şunı Quşma Ştatlardan da kötergä kriäk dip farazlap bula.

-Ali Gilmi
XS
SM
MD
LG