Accessibility links

җомга, 2 декабрь 2016, Казан вакыты 23:03

Samarda tatar diskotekaları başlandı


Samarda tatar yäşläre belän eşläw qolaç ala bara. Menä inde niçä yıllar buyına Färhäd mäxmütov şähärneñ törle poçmağında tatar yäşläre öçen diskotekalar oyıştırıp kilde. Nihayät bu yunäleştä Radik Gazizov ta eşli başladı. Radik Gazizov älegä tatarnıñ buyı citmägän zamança tözelgän zur, yaqtı sport binası MTL “Arena”nı arendağa alıp tatar yäşläre öçen diskoteka uzdırdı. Bügen “Azatlıq” radiosı dulqınında şul turıda Radik Gazizov belän söyläşäbez.

Radik, MTL “Arena” bügenge “tekä” zallarnıñ berse, monda bit baylar ğına yal itä. Niçek batırçılığıñ citte “Arena”nı arendağa alırğa?

Min bu uy belän küptän yanıp yördem. Ni öçen Samar tatarları iñ şäp binalarda yal itmäskä tieş äle? Üzemdä batırçılıq tabıp MTL “Arena” citäkçeläre belän kileşü tözedem häm berençe täcribä yasap qaradım. Tönge biyu kiçäsenä dürt yözgä yaqın tatar yäşlären cıya aldım.

Radik, bez bit bik yaxşı añlıybız, maturlıq öçen tülärgä kiräk, arenda bäyäsen aqlıy aldıñmı soñ?

Äye, arenda xaqları bil sındırırlıq- altmış meñ sum. Äle bit anıñ az ğına bulsa da kereme dä qalırğa tieş. Berençe disktoeqa arenda bäyäsen genä qaplarlıq buldı. Läkin dä töşenkelekkä birelergä yaramıy.

Radik, MTL “Arena” binasında Samar bayları törle trenajerlarda muskulların tığızlıylar, baylarnıñ xatınnarı figuraların soqlanırlıq xäldä totar öçen tüläwle künegülär alalar, munça, basseyn, sawnalar- alar qaramağında. Ä menä tatar yäşläreneñ tönge yalı nindiräk planda bara?

Yal itü ike zalda oyıştırılğan: zur biyu zalı häm ikençe zalda öställär, kem närsä teli şunı aşıy- eçä, zur ekrannan artistlarnı qarıy, tıñlıy.

Närsä, tönge tatar diskotekasında tere cırlawçılar da barmı?

Äye, “Yalqınlı yäşlek” ansambleneñ iñ populyar cırçıların çaqırıp podiumğa kütäräm, biredä bit ğömerdä dä tatar konsertına yöremägän tatar yäşläre berençe märtäbä tatar yäşläreneñ cırlawın kürä. Bälki alar kiläçäktä tatar konsertlarına yul alırlar.

Närsä, sin tatar diskotekasın “Yalqınlı yäşlek” artistları belän genä kütärergä uylıysıñmı?

Andıy çiklänü bulmayaçaq. Qazannan yäş, çibär cırçılarnı çaqıraçaqmın. Tizdän Mälikäne alıp kiläçäkbez. Mälikä- bügenge tatar yäşläreneñ simvolı ul. Mälikädäy yäşlär kübräk bulsa, tatar säxnäse zallarğa şähär tatar yäşlären kiterä alaçaq.

Radik, menä sin Samarnıñ iñ bay, iñ zatlı zalında tatar yäşlären cıyıp tönge yal oyıştırdıñ. Tönge unberdän irtänge altığa qädär barğan muzıykal' tamaşağa kilgän keşelär ber- bersennän ayırılalarmı ällä ber kötüne xäterlätälärme?

Yäşlärneñ kiemenä qarap monısı student, monısı eşçe dip ayırıp bulmıy. Samar tatar yäşläre bik yaxşı kienälär, läkin dä üz- ara söyläşüläre, tärtipläre buyınça, zıyalılıqları kemneñ- kem ikänen kürsätä. Öställär tiräsendä xatınnarı belän küñel açıp utırğan tatar eşmäkärläre zalnı bizädelär. Bu üzenä kürä yäşlärgä ürnäk bulıp qabul itelde. Küregez, eş kürsätegez, Sez dä bezneñ kebek qalın kesäle, aqçalı bulırsız kebek qabul itelde. Yäşlär öçen şul uq zalda “bizmännär” bulu- bik uñışlı närsä häm moña min bik quandım.

Radik Gazizov utız yäşen atlap qına çıqqan, “Yalqınlı yäşlek” ansamblendä cırçı, bayançı, konferans'ye bulıp eşlägän, “Yaqtılıq” isemle mäktäptä muzıka, fizkul'tura uqıtqan uqıtuçı, mäktäp direktorınıñ tärbiä buyınça urınbasarı bulıp eşlägän yäş möğallim, bügenge köndä Samar şähär administratsiäseneñ mäğärif departamentı belgeçe. Şul uq waqıtta ike bala tärbiäläwçe ata da. Läkin dä iñ qimmätlese şunda ki, Radik Gazizov yeget çağınnan uq namazlıqqa basqan keşe, ä xäzer xäläl cefete Göliä belän alın- artlı basıp namaz uquçı taläpçän, tärtiple, xämer- şäräp eçmäwçe, tämäke tartmawçı tatar canlı millätpärvär. Yuğarı belemle, irle- xatınlı Radik- Göliä Gazizovlar millionlı şähär şartlarında, rus moxitendä möselman, tatar milläten quätländerüçe şäxeslär. Şamil Bahautdin, Samar.

XS
SM
MD
LG