Accessibility links

пәнҗешәмбе, 8 декабрь 2016, Казан вакыты 19:19

Samar tatarları BTİÜgä täqdimnär yulladı


Qazanda Bötentatar ictimaği üzäge üzeneñ çirattağı cıyılışın uzdıra. Şul uñay belän Samar tatar milli oyışmaları: "Tuğan tel" isemle Samara ölkä tatar cämğıäte häm Samara şähär tatar milli- mädäni möxtäriäte TİÜ räise Tälğat Bariev isemenä üzläreneñ täqdimnären yunälderdelär. Teläklärneñ berniçäse:

1.Samar tatar milli xäräkäte citäkçeläre Tatarstanda atom stansiäsen buldırmasqa digän TİÜ taläbe belän rizalaşabız.

2. Tatarstannı guberniägä äyländermäs öçen barlıq köçlärne quyarğa.

3. “Tatar ile”, “Tatarskie kraya” gäcitäläreneñ tiracın arttıru östendä eş alıp barırğa, çönki bügenge köndä bu ike basma çın mäğnäsendä sibelgän tatar xalqınıñ mänfägate belän yanıp yäşäwçelär.

4. Tatar ictimaği üzäge tiräsenä Rafael' Xäkimov, Damir İsxakovtay şäxeslärne qabat ezläp tabarğa.

5. Oktäberneñ 15-yen zurlap bilgeläp uzu- ul tatar xalqınıñ xäteren yañartu ğına tügel, ä rus xalqında tolerantnost' tärbiäläw dä.

6. Tatarstan şähär uramnarı Saqqo- Vansetti, Lumumba häm başqa kommunistik ruxtağı isemnärdän arınırğa tieş. Tatar xalqınıñ dahi ulları, qızları, tatar xalqına xezmät itkän şäxeslärneñ iseme genä uram atamaları itep birelergä tieş.

7. Yäş cırçılar üz icatların propagandalıylar, ä kem bezneñ cır däryäsındağı klassik tawışlı Gölsem Söläymanova, Märyäm Raxmankulova, Zifa Basıyrova, Venera şäripova, Mönirä Bulatova, Zöläyxa Xismatullina, Usman Älmiev häm başqa bik küp artistlarıbıznıñ icatın xalıqqa qaytarır?

8. Din ähelläre belän tığız, eşlekle, dustanä elemtälär urnaştırırğa kiräk. Monıñ öçen mullalarnı ğına ğayıpläp, alardan ker ezläwne tuqtatıp, milli xäräkät wäkilläre, sänğat, ädäbiät ähelläre irennärennän tämäkelären ırğıtıp, awızların xämer- şäräbtän ayırıp, namazlıqqa basarğa tieşlär häm üz icatların tatar xalqınıñ äxlaqi normalarına tayanıp, dinebez islam taläplärennän çığıp eş itärgä öyränergä waqıt.

9. Globalizatsiä, urbanizatsiä, barıber tellär betäçäk häm başqa şundıy doşmani şäwlälär aldında cirgä yatudan tuqtarğa häm barlıq resurslarnı cigep, yañaların tabıp şul köçlärgä qarşı torunı oyıştırırğa häm moña bezneñ tatar sälätle dä.

10. Qazan xanlığı yuqqa çıqqan könne iskä alğanda töp lozunglarnıñ berse: “Şovinistlarnıñ milli respublikalarnı guberniägä äyländerü niäte- ul İwan Groznıynıñ kolonial' säyäsäteneñ däwamı digänen dä istä totığız», - dielä Samar tatar milli xäräkäte citäkçeläreneñ Tatar İctimaği Üzägeneñ çirattağı eşlekle söyläşüenä cibärgän täqdimnärendä.

Şamil Bahautdin, Samar.

XS
SM
MD
LG